Çinin ABŞ-nin tarif siyasətinə qarşı bu ölkəyə 34% vergi tətbiq etməsi qlobal tənəzzüllə bağlı ehtimalları 50%-ə çatdırıb.
Teleqraf xəbər verir ki, ABŞ mallarına tətbiq edilən 34 faizlik tariflərə əlavə olaraq, Çin səlahiyyətliləri ölkənin yeddi nadir torpaq elementinə (samarium, gadolinium, terbium, disprosium, lutesium, skandium, ittrium) ixrac nəzarətini gücləndirdiyini açıqlayıb.
Bundan əlavə, Pekin ABŞ-nin 27 şirkətinə ticarət sanksiyası tətbiq edib. Çin Ticarət Nazirliyi bir sıra ABŞ tədarükçüsü ilə bağlı antidempinq araşdırmasına başlayıb.
Trampın tarifləri nəzəri olaraq Çindən ümumi məbləği 439 milyard dollar olan idxalı əhatə edəcək. Çin Xalq Rrespublikasının Baş Gömrük İdarəsinin məlumatlarına görə, cavab olaraq tətbiq edilən simmetrik rüsum ABŞ-dan təxminən 164 milyard dollar məbləğində (yəni təxminən 2,6 dəfə az) idxalı nəzərdə tutur.
Digər tərəfdən, nəzərə alsaq ki, ABŞ Çindən idxal edilən mallara fevralda 20% rüsum tətiq edib, bu ölkədən alınan məhsulların gömrük dəyəri 54%-ə çatacaq.
ABŞ mətbuatının yazdığına görə, Trampın tarifləri son 100 ildə tətbiq etilən ən böyük ticarət maneəsidir.
"JPMorgan Bank" 2025-ci ilin sonuna qədər qlobal iqtisadi tənəzzül ehtimalını 40%-dən 60%-ə yüksəldib.
Ekspertlərin proqnozuna görə, yeni nizam fonunda Çin və Cənub-Şərqi Asiya ölkələri Avropa İttifaqı, Yaponiya və digər bazarlara tədarüklərini gücləndirəcəklər.
