BAKI, 5 aprel. TELEQRAF
Bu gün neft bazarındakı vəziyyəti müzakirə etmək üçün OPEC+ nazirlərinin monitorinq komitəsinin iclası keçiriləcək.
Teleqraf xəbər verir ki, bu dəfə yalnız monitorinq komitəsinin görüşü nəzərdə tutulub.
Belə ki, OPEC+ ölkələrinin bütün nazirlərinin tam formatlı görüşləri altı ayda bir keçirilir. Növbəti belə görüş mayın sonuna planlaşdırılıb.
Qeyd edək ki, aprelin 3-də 2024-cü ilin əvvəlindən könüllü olaraq neft hasilatını sutkada 2,2 milyon barel azaltmağı öhdəsinə götürən OPEC+un səkkiz ölkəsinin onlayn görüşü keçirib. Nəticədə bazar üçün gözlənilməz qərar qəbul edilib. Qurum may ayında neft hasilatının sutkada 411 min barel artımını sürətləndirməyi planlayır. Bu da üç ay ərzində planlaşdırılan hasilat artımına bərabərdir.
OPEC+un bu qərarı eləcə də, ABŞ-nin 185 ölkədən gələn məhsullara gömrük rüsumları tətbiq etməsi "Brent" markalı neftin qiymətinin iki gündə təxminən 10 dollar ucuzlaşmasına səbəb olub. Aprelin 4-də kotirovkalar 2021-ci ilin 23 avqustdan bəri ilk dəfə bir barel üçün 65 dollardan aşağı düşüb.
Nazirlərin monitorinq görüşlərində OPEC+ adətən neft bazarının vəziyyətini qiymətləndirir və alyansın gələcək fəaliyyətlərinə dair tövsiyələr verir. Vacib hallarda komitə OPEC+ nazirlərinin ümumi iclasını da tələb edir.
