BAKI, 21 avqust. TELEQRAF

“Qarabağ”ın futbolçusu Kadi Borqes yeni rekorda imza ataraq Azərbaycan klublarının UEFA Konfrans Liqasındakı ən yaxşı bombardiri adına sahib çıxıb.

Teleqraf xəbər verir ki, bu barədə Peşəkar Futbol Liqasının (PFL) rəsmi saytı məlumat yayıb.

Braziliyalı yarımmüdafiəçi buna turnirdəki 6-cı qolunu vurmaqla nail olub. O, pley-off mərhələsinin “Tvente” ilə Niderlanddakı görüşündə (1:0) fərqlənib. Bununla da Kadi UEFA Konfrans Liqasında “Qarabağ” forması ilə keçirdiyi 17 matçda 6-cı qolunu vurub.

Futbolçunun əvvəlki 5 qolu 2021/2022-ci illər mövsümünə təsadüf edib. Həmin vaxt Kadi III təsnifat mərhələsində Kipr AEL-inə (1:0) və pley-offda Şotlandiya “Aberdin”inə (3:1) bir, qrupda Kipr “Omoniya”sına (4:1) iki, pley-offda isə Fransa “Marsel”inə (1:3) bir qol vurub.

Bunadək Azərbaycan klublarının UEFA Konfrans Liqasındakı ən yaxşı bombardiri adına üç şərik var idi. Kadidən başqa Coy-Lens Mikels (“Sabah”) və Rafael Utziq (“Qəbələ”, “Zirə”) hərəyə 5 qolla liderliyi bölüşürdülər.

Qeyd edək ki, Kadi Borqes “Qarabağ”ın heyətində avrokuboklardakı ümumi qol sayını 11-ə çatdırıb.