TBİLİSİ, 2 aprel. TELEQRAF

Gürcüstanın azərbaycandilli məktəbləri üçün Azərbaycanın təqdim etdiyi dərsliklər yeni olsalar da, fənn müəllimləri tədris zamanı problemlərin yarandığını bildirirlər.

Teleqraf-ın yerli bürosu xəbər verir ki, bu barədə Gürcüstan ombudsmanı Levan İoselianinin 2024-cü il üzrə İnsan hüquqları və azadlıqlarının vəziyyətinə dair hesabatında bildirilib.

Sənəddə qeyd olunub ki, birinci sinif üçün Azərbaycan dili dərsliyi əlifbadan başlamır, belə ki, Gürcüstandan fərqli olaraq Azərbaycanda I sinfə qəbul olunanlar öncə hazırlıq dövrünü keçir.

Hesabatda məsələ ilə bağlı Gürcüstanın Təhsil, Elm və Gənclər Nazirliyinə tövsiyə verilib. Ombudsman azərbaycandilli məktəblər üçün Ana dili və Ədəbiyyat fənnləri üzrə dərsliklərin tərtibi və nəşri üçün səmərəli addımların atılmasını və bu fənnlər üzrə tədris prosesinin Gürcüstanda nəşr olunan dərsliklər əsasında təmin olunmasını təklif edib.

Qeyd edək ki, Gürcüstanın azərbaycandilli məktəblərini Azərbaycan dili və Ədəbiyyat dərslikləri ilə Azərbaycanın Elm və Təhsil Nazirlyi təmin edir. 2024-2025-ci tədris ili üçün qonşu ölkəyə 18 adda 23 min 960 nüsxə Ana dili və Ədəbiyyatı dərslikləri, müəllimlər üçün metodik vəsait göndərilib.