BAKI, 11 noyabr. TELEQRAF

İsrail ordusu Dəməşqdən 46 kilometr cənub-qərbdə, Hermon dağının ətəklərində yerləşən Suriyanın Beyt Jann şəhərinin kənarına atəş açıb.

Teleqraf xəbər verir ki, bu barədə SANA agentliyi məlumat yayıb.

Hakimiyyət orqanlarının məlumatına görə, sakinlər arasında itki yoxdur.

Radikal Fələstin qruplaşmalarının üzvləri əvvəllər bu dağlıq ərazidə fəaliyyət göstəriblər. Hermon dağına nəzarət edən İsrail qüvvələri sonuncu dəfə sentyabrın 13-də orada təmizləmə əməliyyatı keçirib.

Çərşənbə axşamı İsrail ordusu Quneytra əyalətinin Trange kəndində hərəkətə məhdudiyyətlər qoyub. Nəqliyyat vasitələrini və piyadaları yoxlamaq üçün onun kənarında bir yoxlama məntəqəsi qurulub. İsrail Müdafiə Qüvvələrinin bölmələrinin Vadi Raqqad ərazisini təmizlədiyi və dronların dəstəklədiyi əməliyyatın davam etdiyi qonşu Dəraa əyalətinin qərb hissəsindəki yollarda əlavə yoxlama məntəqələri qurulub.