BAKI, 17 avqust. TELEQRAF
ABŞ ordusu "Raytheon" (RTX) şirkəti ilə "Tomahawk" raketlərinin istehsalını artırmaq məqsədi daşıyan 22,9 milyard dollarlıq müqavilə imzalayıb.
Teleqraf xəbər verir ki, ABŞ müttəfiqlərinə külli miqdarda silah tədarük edib və İranla münaqişə zamanı fəal şəkildə sursat xərcləyib ki, bu da hava hücumundan müdafiə və dəqiq silah ehtiyatlarının tükənməsi ilə bağlı ciddi narahatlıqlar yaradıb.
Hərbi Dəniz Qüvvələrinin katibi vəzifəsini icra edən Hunq Kao X platformasında paylaşımında bildirib ki, "Tomahawk" istehsalı üçün tarixi müqavilə hərbçilərin ehtiyac duyduqları atəş gücünə sahib olmağa imkan verəcək.
"Raytheon" müqavilənin yeddi il müddətinə qüvvədə olacağını və şirkətə "Tomahawk" raketlərinin illik istehsalını 1000 ədəddən çoxa çatdırmağa imkan verəcəyini bildirib. Şirkət hazırda ildə yalnız 60 raket istehsal edir.
ABŞ Hərbi Dəniz Qüvvələrinin yerüstü donanmasının əsasını təşkil edən daşıyıcıdan atılan "Tomahawk" raketləri gəmilərdən və sualtı qayıqlardan uzaq məsafələrdə quru hədəflərə yüksək dəqiqliklə zərbələr endirir.
