​BAKI, 6 aprel. TELEQRAF

Britaniyanın Baş naziri Kir Starmer bildirib ki, son illərdə yaradılmış dünya nizamı ABŞ Prezidenti Donald Trampın ticarət müharibəsinə görə məhv olub.

Teleqraf xəbər verir ki, onun sözlərini "The Telegraph" sitat gətirir.

Siyasətçinin fikrincə, keçmiş ideyaları artıq təbii qəbul etmək olmaz, yeni dünya müəyyən edilmiş qaydalara deyil, sövdələşmələrə və ittifaqlara əsaslanır.

"Bizim bildiyimiz dünya yox oldu. Biz bundan sonra baş verəcəklərə hazırıq", - Starmer deyib.

O əlavə edib ki, ticarət müharibəsindən heç kim fayda görməyəcək, eləcə də Böyük Britaniya və digər ölkələr ciddi iqtisadi nəticələrlə üzləşəcək.

Starmer baş verənlərə baxmayaraq, hələ də azad və açıq ticarət ideyasını dəstəklədiyini vurğulayıb.