BAKI, 22 iyul. TELEQRAF

İsrail hərbçiləri Qəzza zolağında Ümumdünya Səhiyyə Təşkilatının (ÜST) iki əməkdaşını saxlayıb, nəticədə təşkilatın anklavdakı fəaliyyət mövcudluğu zəifləyib.

Teleqraf xəbər verir ki, bu barədə təşkilat “X” sosial şəbəkəsində məlumat yayıb.

ÜST-nin paylaşımında bildirilir ki, İsrail hərbçiləri ÜST əməkdaşlarının yaşadığı binaya daxil olub, qadınları və uşaqları piyada Əl-Məvasi istiqamətində təxliyə ediblər. Kişi əməkdaşların və onların ailə üzvlərinin qollarına qandal vurulub, onlar soyundurulub, yerində sorğu-sual edilib və silah təhdidi altında axtarış aparılıb. ÜST-nin iki əməkdaşı və onların iki ailə üzvü saxlanılıb. Həmin şəxslərdən üçü sonradan azad edilib, lakin bir əməkdaş hələ də nəzarət altındadır.

Təşkilat həmçinin əlavə edib ki, son təxliyə əmri ÜST tərəfindən istifadə olunan bir sıra binalara təsir edib.

Bildirilir ki, BMT-nin səhiyyə sahəsində aparıcı agentliyi olan ÜST-nin Qəzzadakı fəaliyyət mövcudluğu zəifləyib, bu da dağılan səhiyyə sistemini dəstəkləmək səylərinə mənfi təsir göstərir və iki milyondan çox insanın sağ qalmasını daha da çətinləşdirir.