BAKI, 5 aprel. TELEQRAF

Bakıda "Gülüstan" sarayında Cənub Qaz Dəhlizi Məşvərət Şurası çərçivəsində nazirlərin 11-ci və Yaşıl Enerji Məşvərət Şurası çərçivəsində nazirlərin 3-cü iclaslarının keçirilməsi vacib əhəmiyyət kəsb edir. Tədbirdə çıxış edən Prezident İlham Əliyev Cənub Qaz Dəhlizi Məşvərət Şurasının 11-ci dəfədir ki, Bakıda toplaşdığını diqqətə çatdırıb. Azərbaycan tərəfindən başlanmış və Avropa Komissiyası tərəfindən dəstəklənmiş bu vacib toplantının enerji təhlükəsizliyi sahəsində yanaşmaların formalaşdırılmasında, həmin məsələlərin həllində və birgə səylərin əlaqələndirilməsində mühüm rol oynadığı qeyd olunub.

Bu sözləri Teleqraf-a Respublika Ağsaqqallar Şurasının sədri, Milli Məclisin deputatı, professor Eldar Quliyev deyib.

Professor qeyd edib ki, Azərbaycan Prezidentinin də vurğuladığı kimi burada əsas məqsəd əməkdaşlığın gücləndirilməsidir: “Çünki əməkdaşlıq olmadan enerji təhlükəsizliyi layihələrinin heç biri mümkün olmayacaq. Digər vacib amil isə qonşu və tərəfdaşlar ölkələrin enerji təhlükəsizliyinin təmin edilməsidir. Azərbaycan enerji sahəsində etibarlı tərəfdaşdır və Pan-Avropa qaz təchizatçısıdır. Bu, həqiqətdir. Ölkəmizin başçısının da vurğuladığı kimi Azərbaycanın qaz təchizatının coğrafiyası genişlənir. Bakıda keçirilmiş son görüşdən, yəni, 10-cu Məşvərət Şurasından sonra əlavə 5 ölkə Azərbaycanın təbii qazının alıcısına çevrildi. Artıq Azərbaycanın təbii qazı 12 ölkəyə ixrac edilir ki, onlardan 10-u Avropa ölkəsidir. Həmin ölkələrdən 8-i isə Avropa İttifaqının üzvüdür. Sözsüz ki, bundan sonra da Azərbaycanın Avropada qaz təchizatının coğrafiyası birmənalı olaraq genişlənəcək. Bu xüsusda ən mühüm layihələrdən biri Cənub Qaz Dəhlizidir. 3500 kilometrlik inteqrasiya edilmiş boru kəməri sistemi bir çox ölkələrin enerji təhlükəsizliyi üçün əsas arteriyadır.

Artıq o, tam gücü ilə işləyir. İstər Cənubi Qafqaz Boru Kəməri, istərsə də TANAP və ya TAP - Cənub Qaz Dəhlizinin üç ayrılmaz hissəsi işlək vəziyyətdədir. Azərbaycan Prezidenti də bu enerji şəbəkəsinin fəaliyyətinə diqqət çəkərək onların daha da genişlənməsi mesajlarını da vermiş oldu. Bütün bunlar onu deməyə əsas verir ki, Avropada çox geniş yaşıl gündəliyə baxmayaraq, faydalı qazıntı hasilatçıları və ənənəvi yanacaq enerji təhlükəsizliyinin mühüm meyarı kimi yaddan çıxmayacaq. Ötən il Bakıda keçirilən COP29-da məhz bu amillər bir daha gündəmə gətirildi. Əslində Azərbaycan qlobal beynəlxalq tədbirə ev sahibliyi etməklə enerji təminatının qeyri-bərabər paylanmasına qarşı vacib çağırışların edilməsini də bir növ təşviq etmiş oldu”.

Deputat bildirib ki, Cənub Qaz Dəhlizi layihəsi Azərbaycanın enerji diplomatiyasının ən uğurlu nümunələrindən biri kimi qiymətləndirilir: “Prezident İlham Əliyevin uzaqgörən siyasətinin nəticəsində həyata keçirilən bu layihə ölkəmizin Avropanın enerji təhlükəsizliyində mühüm tərəfdaşa çevrilməsinə imkan yaradıb. Bununla yanaşı, Azərbaycan yaşıl enerji sahəsində mühüm addımlar atır. Ölkəmiz bərpaolunan enerjinin istehsalı və ixracı istiqamətində yeni layihələri təşviq edir. Bu baxımdan da bərpaolunan və yaşıl enerji əsasında istehsal edilən elektrikin ixracı Azərbaycanın enerji strategiyasında yeni eranın başlanğıcı hesab olunur. Bu bir reallıqdır ki, ölkəmizdə energetika sahəsində bərpaolunan enerji mənbələrindən istifadənin genişləndirilməsi Prezident İlham Əliyev tərəfindən prioritet vəzifə olaraq irəli sürülüb və 2030-cu ilədək elektrik enerjisinin qoyuluş gücündə bu enerjinin payının 30 faizə çatdırılması hədəf kimi müəyyənləşdirilib”.

Eldar Quliyev hesab edir ki, bu gün Azərbaycan qaz ixracatçısı olmaqla yanaşı yaşıl enerji mənbələrinə sərmayə yatıran ölkə kimi də mövqeyini daha da gücləndirir: “Azərbaycan yaşıl enerji strategiyası böyük potensiala sahibdir. Sözsüz ki, qarşıdakı illərdə bu sahənin inkişafı üçün daha böyük addımların atılması nəzərdə tutulub. Ölkəmizin yerləşdiyi təbii coğrafi şərait də buna imkan verir. Xəzər dənizinin külək enerjisi potensialından istifadə edərək daxili tələbatı ödəməklə yanaşı Avropaya yaşıl enerji ixracı üçün də böyük imkanlar yaradır. Eyni zamanda Qarabağ və Şərqi Zəngəzur iqtisadi rayonlarının “yaşıl enerji zonası” elan edilib. Bu amil Azərbaycanın yaşıl strategiyasının böyük hədəflərə malik olduğunu bir daha təsdiqləmiş olur. Günəş və külək enerjisi layihələrinin genişləndirilməsi, su elektrik stansiyalarının modernləşdirilməsi və beynəlxalq tərəfdaşlarla əməkdaşlığın dərinləşdirilməsi Azərbaycanın bu sahədəki strateji məqsədlərindən biridir. Azərbaycan 2050-ci ilə qədər karbon emissiyalarını minimuma endirməyi hədəfləyib ki, bu da enerji sektorunda bərpaolunan mənbələrin payını əhəmiyyətli dərəcədə artırmağa təşviq edəcək ən mühüm amillərdən biridir”.