BAKI, 21 avqust. TELEQRAF

Ağcabədidə maye qazdoldurma məntəqəsində baş verən partlayışla bağlı Fövqəladə Hallar Nazirliyi (FHN) də məlumat yayıb.

Teleqraf xəbər verir ki, FHN-in “112” qaynar telefon xəttinə Ağcabədi rayonu, Aşağı Avşar kəndi ərazisində fəaliyyət göstərən maye qazdoldurma məntəqəsində yanğın baş verməsi barədə məlumat daxil olub.

Məlumatla əlaqədar dərhal əraziyə FHN-in Dövlət Yanğından Mühafizə Xidmətinin Ağcabədi rayon Yanğından Mühafizə Hissəsinin qüvvələri cəlb edilib.

Hadisə yerində əməliyyat şəraitinin qiymətləndirilməsi zamanı yanğının məntəqənin ərazisində yerləşən ofisdə baş verdiyi və maye qazla dolu çənə keçmə riskinin yüksək olduğu müəyyən edilib.

Yanğınsöndürənlər tərəfindən həyata keçirilən zəruri və təxirəsalınmaz tədbirlər sayəsində yanğın genişlənərək yanacaqdoldurma məntəqəsinin ərazisinə yayılmasına və yanacaq çəninə keçməsinə imkan verilmədən qısa müddətdə söndürülüb.

Yanğın nəticəsində ümumi sahəsi 16 m² ofisin yanar konstruksiyaları yanıb. Vətəndaşlar - 1979-cu il təvəllüdlü Qurbanov Ruslan İslam oğlu, 1988-ci il təvəllüdlü Şükürov Samir Hüseyn oğlu və 2013-cü il təvəllüdlü Şükürov Ramil Samir oğlu müxtəlif dərəcəli yanıq xəsarətləri alıb.

Ərazisdəki digər tikililər və həcmi 20 kub.m. olan maye qazla dolu çən yanğından mühafizə olunub.

***

22:36

AĞCABƏDİ, 21 avqust. TELEQRAF

Ağcabədidə maye qazdoldurma məntəqəsində baş verən partlayış nəticəsində 3 nəfər xəsarət alıb.

Teleqraf-ın Qarabağ bürosunun xəbərinə görə, hadisə rayonun Avşar kəndi ərazisində yerləşən maye qazdoldurma məntəqəsində baş verib.

Hadisə zamanı Qurbanov Ruslan İslam oğlu, Şükürov Ramil Samir oğlu və Şükürov Samir Hüseyn oğlu müxtəlif dərəcəli xəsarət alaraq, Ağcabədi Mərkəzi Rayon Xəstəxanasına çatdırıb.

FHN-in Dövlət Yanğından Mühafizə Xidmətinin Ağcabədi rayon Yanğından Mühafizə Hissəsinin qüvvələri yanğının qarşısını alıblar.

Faktla bağlı araşdırma başlanılıb.