BAKI, 23 oktyabr. TELEQRAF
Azərbaycan UEFA reytinqində cari avrokubok həftəsini 24-cü pillədə başa vurub.
Teleqraf xəbər verir ki, bu, Çempionlar Liqası, Avropa Liqası və Konfrans Liqasında keçirilən növbəti matçlardan sonra bəlli olub.
Həftənin nəticələrinə əsasən, Azərbaycanın əsas təqibçisi olan İsrail təmsilçisi "Hapoel" (Beer-Şeva) klubunun Belçikada "Yunion"a 0:4 hesabı ilə uduzması fonunda İsrailin bizi ötmək şansı gerçəkləşməyib.
Cədvəldə birbaşa qonşularımız olan digər ölkələrin klubları isə həftəni fərqli nəticələrlə başa vurublar. 23-cü sırada yer alan Ukraynanın yeganə təmsilçisi "Şaxtyor" (Donetsk) Çempionlar Liqasında İtaliyada "İnter"ə 0:1 hesabı ilə uduzaraq xalsız qalıb. 22-ci pillədəki Rumıniyanın "Universitatya Krayova" klubu isə Konfrans Liqasında Andorra "İnter Eskaldes"ini səfərdə 3:1 hesabı ilə məğlub edərək ölkəsinə növbəti reytinq xallarını qazandırıb.
Hazırda Azərbaycan 24.187 əmsalla 24-cü pillədəki mövqeyini qoruyur. Bizi yaxından izləyən İsrail 24.125 əmsalla 25-ci yerdədir. Bir pillə önümüzdə olan Ukrayna 24.837, Rumıniya isə 25.625 əmsala sahibdir.
Xatırladaq ki, Azərbaycanın avrokuboklardakı yeganə təmsilçisi "Sabah" komandasıdır. Bakı klubu UEFA Çempionlar Liqasının əsas mərhələsinin III turunda evdə Almaniyanın "Borussiya" (Dortmund) kollektivinə 1:2 hesabı ilə uduzub.
