BAKI, 4 fevral. TELEQRAF
"Nikol Paşinyan və İlham Əliyev Ermənistan və Azərbaycan arasında münasibətlərin normallaşdırılması prosesinin müsbət dinamikasının qorunması və inkişaf etdirilməsinin vacibliyini müzakirə ediblər".
Teleqraf xəbər verir ki, bu fikirləri erməni mediasına müsahibəsində politoloq Areq Koçinyan deyib.
Onun sözlərinə görə, belə görüşlər vacibdir və müzakirə olunacaq çoxlu sayda yığılmış məsələ var:
"İqtisadi əlaqələr qarşılıqlı etimadın vacib mexanizmidir və riskləri azaltmağa imkan verir. Ermənistan-Azərbaycan iqtisadi, enerji və ticarət əlaqələri nə qədər böyükdürsə, münaqişə ehtimalından bir o qədər uzaqlaşırıq və tam sülhə yaxınlaşırıq.
Mən uzun müddətdir ki, yalnız iqtisadi və ticarət münasibətləri ilə məşğul olacaq ayrıca bir iqtisadi danışıqlar yolu yaratmağı təklif edirəm. Bilirsiniz ki, məsələn, sərhədlərin demarkasiyası, kommunikasiyaların açılması və siyasi danışıqlardan imtina yolları artıq mövcuddur. Beləliklə, düşünürəm ki, iqtisadi yol yaratmaq ehtiyacı da yaranıb".
Politoloq qeyd edib ki, iki liderin vətəndaş cəmiyyətinin qarşılıqlı səfərləri məsələsinə toxunması çox vacibdir: "Tərəflər qeyd etdilər ki, hər iki cəmiyyət bu prosesin şahidi olacaq və iştirak edə biləcək. Bu da vacibdir.
Gündəlik həyatda sülhün real faydalarının təzahürünə və ictimai əhval-ruhiyyənin dəyişməsinə gəldikdə isə, qeyd etmək lazımdır ki, bu, davamlı bir prosesdir və mənim fikrimcə, onilliklər çəkə bilər.
Sülh müqaviləsi imzalanıb təsdiqlənsə belə, bu, cəmiyyətlərin bir-birlərinə qarşı mövcud münasibətlərini dərhal dəyişəcəyi anlamına gəlmir. Bu, uzunmüddətli bir vəzifədir.
Ölkələrimiz arasında əsl sülh quruculuğu müqavilənin imzalanmasından dərhal sonra başlayacaq və burada cəmiyyət, xüsusən də vətəndaş cəmiyyəti təməl daşı rolunu oynayacaq".
