BAKI, 29 dekabr. TELEQRAF
Serbiya Prezidenti Aleksandar Vuçiç 2026-cı ildə ölkədə növbədənkənar parlament seçkilərinin keçiriləcəyini təsdiqləyib və hakimiyyətin etiraz aksiyalarının iştirakçılarının əsas tələblərindən birini yerinə yetirdiyini bildirib.
Teleqraf xəbər verir ki, bu barədə Vuçiç Belqradda parlament binası qarşısında vətəndaşlar qarşısında çıxışı zamanı deyib.
“Biz onların əsas tələbini qəbul etdik, tezliklə, gələn il seçkilərə gedəcəyik”, - o qeyd edib.
Dövlət başçısı növbədənkənar seçkilərin etirazçıların hərəkətlərinə siyasi cavab olacağına əmin olduğunu vurğulayıb.
“Lakin səslər hesablananda onlar o qədər də xoşbəxt olmayacaqlar. Biz Serbiyanın hər yerində onları məğlub edəcəyik”, - Vuçiç bildirib.
