BAKI, 5 aprel. TELEQRAF

Argentinanın keçmiş Prezidenti Kristina Fernandes de Kirşner ukraynalı həmkarı Volodimir Zelenskini hazırkı dövlət başçısı Xavyer Miley ilə müqayisə edib.

Teleqraf xəbər verir ki, Kirşner bu barədə sosial şəbəkə hesabında paylaşım edib.

Onun sözlərinə görə, hazırki Argentina prezidentinin ABŞ ilə münasibətlərə verdiyi önəm onu Zelenski ilə eyni mövqeyə gətirir.

“Oval kabinetdə Zelenskinin təlxət kimi əksini gör və artıq lazım olmadıqda onun başına nələrin gəldiyini düşün”, - paylaşımda qeyd olunub.

Kirşner, həmçinin Mileyi ABŞ-nin Argentina məhsullarına tətbiq etdiyi gömrük rüsumlarına verdiyi reaksiya ilə görə tənqid edib: “Sən bizə onları dostlarımız kimi təqdim etmək istəyirsən? Ən yaxşı halda onlar yalnız sənin dostlarındır. Amma bunu da düşün - sənə də Cənubi Amerikanın digər ölkələri kimi eyni rüsumlar tətbiq edilib. Hətta, sən kommunist adlandırdığın hökumətlərlə eyni səviyyəyə salınmısan”.

Xatırladaq ki, Argentina dövlət başçısı Xavyer Miley 2023-cü il dekabrın 10-da vəzifəsinin icrasına başlayıb.

Prezident postuna gəldikdən sonra o, ABŞ-ə 10 dəfə səfər edib.