BAKI, 3 aprel. TELEQRAF

İsrailin Baş naziri Benyamin Netanyahu "X" hesabında paylaşdığı video müraciətində Rəfah və Xan Yunis şəhərlərini ayıran yeni dəhliz qurduqlarını açıqlayıb.

Teleqraf CNN-ə istinadən xəbər verir ki, Netanyahu bu gecə Qəzzada əməliyyatları gücləndirəcəklərini bildirib: "İsrail ordusu bölgəni addım-addım ələ keçirir, silahlıları zərərsizləşdirir və infrastrukturu məhv edir".

İsrailin girovları geri almaq üçün təzyiqləri artırdığını deyən Netanyahu "onları geri qaytarmasalar, təzyiqləri daha da artıracağıq", deyə qeyd edib.

İsrailin müdafiə naziri Yisrael Katz Qəzza zolağına hücumlarını genişləndirdiklərini və daha çox ərazini İsrailin “təhlükəsizlik zonasına” daxil etməyi hədəflədiklərini açıqlayıb.

Bu hücumlar çərçivəsində Rəfah sakinlərinə təxliyə əmrləri göndərilib. Yanvarın 19-da qüvvəyə minən atəşkəsdən sonra İsrail ordusu martın 18-i səhər saatlarında Qəzzaya intensiv hücumlarını bərpa edib.