BAKI, 3 aprel. TELEQRAF

Londonda Britaniya kəşfiyyatının - MI 5-in sərgisi açılıb.

Teleqraf "Associated Press"ə istinadən xəbər verir ki, sərgidə casusluq tarixində mühüm rol oynamış 110 yaşlı qurudulmuş limon da nümayiş etdiriləcək.

Sərgidə həmçinin kiçik casus kameraları, sovet casusu Qay Burgessin tərk etdiyi portfel də tamaşaçılara göstəriləcək.

110 yaşlı limona gəldikdə isə onun maraqlı tarixçəsi var. Bu limon I Dünya müharibəsi zamanı Britaniyada alman casusu olan Karl Müllerin həbsinə səbəb olub. Polis 1915-ci ildə şübhəli Müllerin çarpayısının yanındakı masada və paltosunun cibindən iki limon tapıb. Sonradan məlum olub ki, alman casus həmin limonun şirəsindən mürəkkəb kimi istifadə edərək ölkəsinə gizli məktublar yazıb. Müller 1915-ci ildə London qülləsində güllələnərək edam edilib.

Sərgidə həmçinin Milli Arxivdə saxlanılan məxfiliyi silinmiş sənədlər və Mİ 5-in Londondakı baş qərargahı olan Thames House-dakı gizli muzeydən götürülmüş əşyalar da var.

1909-cu ildə iki zabitdən ibarət ilkin heyətlə qurulan Gizli Xidmət Bürosu 1944-cü ildə müttəfiq qoşunların yeri barədə Almaniyaya dezinformasiya ötürüb.

Eksponatlar arasında 1991-ci ildə Baş nazir Con Meyjor kabinet iclasını keçirərkən İrlandiya Respublika Ordusu tərəfindən Dauninq-strit 10 ünvanında atılan minaatan mərmisi də var. MI 5 arxiv sənədləri yalnız 1997-ci ildə əldə edərək ictimailəşdirib.