BAKI, 25 iyun. TELEQRAF

“Dövlət Tibbi Sığorta və Ekspertiza Agentliyi” publik hüquqi şəxsin Nizamnaməsi təsdiq edilib və qurumun nizamnamə fondu 10 milyon 565 min 947 manat 36 qəpik olaraq müəyyən edilib.

Teleqraf xəbər verir ki, bununla bağlı Prezident İlham Əliyev Fərman imzalayıb.

Təsdiqlənmiş Nizamnaməyə əsasən, Agentlik Azərbaycan Respublikası Əmək və Əhalinin Sosial Müdafiəsi Nazirliyinin tabeliyində Bakı şəhərində fəaliyyət göstərəcək.

Agentlik ölkədə icbari tibbi sığortanın tətbiqi, vəsaitlərin icbari tibbi sığorta fondunda cəmləşdirilməsi və idarə olunması ilə yanaşı, dövlət adından tibbi xidmətlərin mərkəzləşdirilmiş alıcısı qismində çıxış edəcək.

Sənədlə Agentliyin fəaliyyət dairəsinə daha bir mühüm səlahiyyət verilib. Belə ki, qurum strukturuna daxil olan komissiyalar vasitəsilə əlilliyin qiymətləndirilməsini, həmçinin müddətli həqiqi hərbi xidmətə çağırılan vətəndaşların yekun tibbi müayinəsini həyata keçirəcək. Agentliyin idarəetmə orqanı isə əmək və əhalinin sosial müdafiəsi naziri tərəfindən təyin olunan İdarə Heyətinin sədri və onun dörd müavinindən ibarət olacaq.

Fərmana əsasən, Nazirlər Kabineti və Əmək və Əhalinin Sosial Müdafiəsi Nazirliyi sənəddən irəli gələn digər məsələlərin həllini təmin edəcək.