BAKI, 25 iyun. TELEQRAF

Azərbaycanda hərbi qulluqçular fərdi identifikasiya nömrəsini və qan qrupunu özündə əks etdirən rəsmi şəxsi jetonla təmin olunacaqlar.

Teleqraf xəbər verir ki, bununla bağlı Prezident İlham Əliyev “Hərbi xidmətkeçmə haqqında” Əsasnamənin təsdiq edilməsi barədə” və “Hərbi vəzifə və hərbi xidmət haqqında” qanunlarda dəyişiklik edilməsi barədə Qanunu və onun tətbiqi haqqında Fərmanı imzalayıb.

Qanuna edilən dəyişikliyə əsasən, hərbi qulluqçuların xidmət etdikləri dövlət orqanları və ya həmin orqanların strukturuna daxil olan qurumlar tərəfindən şəxsi jetonla təmin edilməsi rəsmiləşdirilib. Sənəddə şəxsi jetonun hüquqi tərifi də təsbit olunub. Belə ki, şəxsi jeton – həlak olmuş, ölmüş, xəsarət (yaralanma, travma, kontuziya) almış hərbi qulluqçuların şəxsiyyətini müəyyən etmək üçün istifadə edilən, fərdi identifikasiya nömrəsini və qan qrupunu özündə əks etdirən nişandır.

Dövlət başçısının imzaladığı Fərmanla hərbi qulluqçuların şəxsi jetonla təmin edilməsi, jetonun təsviri, xüsusiyyətləri və uçotunun aparılması qaydasının müəyyən edilməsi rəsmən Nazirlər Kabinetinə tapşırılıb. Hökumət altı ay müddətində bu qaydaları təsdiq edib Azərbaycan Prezidentinə məlumat verməlidir.

Fərmana əsasən, Müdafiə Nazirliyi, Daxili İşlər Nazirliyi, Dövlət Sərhəd Xidməti və digər aidiyyəti güc strukturları isə jetonların hazırlanmasına tələb olunan vəsaitə dair təkliflərini dövlət büdcəsində nəzərdə tutulması üçün Maliyyə Nazirliyinə təqdim etməlidirlər. Dəyişikliklər qanunla eyni gündə qüvvəyə minir.