TOVUZ, 4 aprel. TELEQRAF

Tovuz rayonunun Bozalqanlı kəndində itkin düşən 2012-ci il təvəllüdlü Aysun Süleymanova axşam saatlarında Gəncə şəhərində tapılıb.

Bu barədə Teleqraf-ın yerli bürosuna məktəbli qızın atası Elçin Süleymanov məlumat verib.

"Gecə saatlarında polisdən zəng gəldi və bildik ki, uşaq tapılıb. Şükürlər olsun, sağ-salamatdır", - o bildirib.

Daxii İşlər Nazirliyinin Mətbuat xidmətinin Gəncə regional qrupunun baş inspektoru Eşqin Qasımov Teleqraf-ın yerli bürosuna faktı təsdiqləyib.

Onun sözlərinə görə, Tovuz Rayon Polis Şöbəsinin əməkdaşlarının keçirdikləri müvafiq tədbirlər nəticəsində A.Süleymanovanın yeri Gəncə şəhərində müəyyən edilərək, Tovuz rayonuna gətirilib.

"Hazırda ailəsinə təhvil verilməsi gözlənilir", - E.Qasımov söyləyib.

Qeyd edək ki, Tovuzun Bozalqanlı kənd sakini, 2012-ci il təvəllüdlü A.Süleymanova aprelin 2-si saat 18 radələrində oxuduğu məktəbdən çıxmış və itkin düşmüşdü.