BAKI, 29 may. TELEQRAF

Azərbaycan Ordusunun hərbçisinin Kəlbəcərdə minaya düşməsi faktı ilə bağlı cinayət işi başlanıb.

Bu barədə Teleqraf-a Hərbi Prokurorluqdan bildirilib.

Müdafiə Nazirliyinin N saylı hərbi hissəsinin hərbi qulluqçusu Xudaverdi Sadıqovun piyada əleyhina minanın partlaması nəticəsində müxtəlif dərəcəli bədən xəsarətləri alması faktı üzrə Kəlbəcər hərbi prokurorluğunda Cinayət Məcəlləsinin 29,120.2.12-ci (milli ədavət və ya düşmənçilik niyyəti ilə qəsdən adam öldürməyə cəhd) maddəsi ilə cinayət işi başlanılıb.

Hazırda ibtidai istintaq aparılır.

***

13:13

Azərbaycan hərbi qulluqçusu Kəlbəcərdə minaya düşüb.

Bu barədə Teleqraf-a Müdafiə Nazirliyindən məlumat verilib.

Qeyd olunub ki, mayın 29-da saat 10:10 radələrində Kəlbəcər rayonunun İstisu yaşayış məntəqəsi istiqamətində Azərbaycan Ordusunun mühəndis-istehkam bölmələrinin əraziləri mina və partlamamış döyüş sursatlarından təmizləməsi zamanı hərbi qulluqçumuz Sadıqov Xudaverdi Həsən oğlu ermənilər tərəfindən basdırılmış piyada əleyhinə minaya düşərək, sol ayağından xəsarət alıb.

"Dərhal ilkin tibbi yardım göstərilən hərbi qulluqçumuz ixtisaslı müayinə və müalicə olunması üçün yaxınlıqdakı hərbi hospitala təxliyə olunub", - deyə məlumatda qeyd olunub.