BAKI, 4 aprel. TELEQRAF

Bakıda qızını xüsusi amansızlıqla öldürməkdə təqsirləndirilən Yelmar Atakişiyevin cinayət işi üzrə məhkəmə prosesi keçirilib.

Teleqraf xəbər verir ki, Bakı Ağır Cinayətlər Məhkəməsində hakim Elnur Nuriyevin sədrliyi ilə baş tutan prosesdə dövlət ittihamçısı ittiham aktını elan edib.

İttihama münasibət bildirən Yelmar Atakişiyev ifadə verib və özünü qismən təqsirli bildiyini deyib.

Təqsirləndirilən şəxs ifadəsində bildirib:

"Cəzaçəkmə müəssisəsində olduğum vaxt yaxınlarım məni görməyə gəlirdi. Onlar gələndə qızım barədə şikayət edirdilər. Oğlum mənə vəziyyəti danışdı. Dedim ki, sən heç nə etmə, mən çıxandan sonra onunla danışaram.

Cəzam bitdikdən sonra qızımı bir neçə dəfə izləmişəm. Ona izah etməyə çalışdım ki, belə hərəkətlərə yol vermək olmaz. Dedim ki, əgər belə bir şeyi istəyirsənsə, övladlarına mən baxaram, sən get, öz həyatını yaşa. Amma dediklərimi başa düşmədi. Məhkumluğuma görə heç bir yerdə işləyə də bilmirdim. Nəvələrimə vaxt ayırırdım. Həftədə bir dəfə də olsa, qızımla danışırdım. Deyirdim ki, əgər nəsə etmisənsə, bundan sonra daha etmə.

Hadisə baş verən günü özü mənə zəng etmişdi. Meyvə almışdı. Birdən dedi ki, saat 5-də çıxmalıyam. Dedim, səni aparıb yola salaram. Amma razılaşmadı. Çantasına baxanda gördüm, 2 telefon işlədir. Dedim, telefonun kilidini aç, baxacam, icazə vermədi. Buna görə onu döydüm. O, qapıya tərəf qaçdı. Qapını açıb getmək istədi, saçından tutub qoymadım. Başı qapıya dəydi. 3-5 dəqiqə onu döydüm. Səsini də çıxarmırdı.

Sonra özünü huşsuzluğa vurdu, burnundan qan gəlirdi. Daha sonra qardaşı gəldi, nə baş verdiyini soruşdu. Dedim ki, ayılsın, özündən soruşarsan. Niyyətim onu öldürmək deyildi. Qardaşı onu qucağına alıb divana apardı. Anası gəldi, vəziyyəti izah etdim, sonra oradan uzaqlaşdım. Sonra oğlum mənə zəng edib bacısının öldüyünü dedi".

Növbəti məhkəmə prosesi mayın 2-nə təyin edilib.

Qeyd edək ki, hadisə ötən ilin noyabrında Bakının Zabrat qəsəbəsində baş verib.

Qəsəbə sakini Cəmalə Atakişiyeva yaşadığı evdə qətlə yetirilib. Araşdırmalar zamanı onun atası Yelmar Atakişiyev tərəfindən öldürüldüyü müəyyən olunub.

Ona qarşı Cinayət Məcəlləsinin 120.2.4-cü (xüsusi amansızlıqla və ya ümumi təhlükəli üsulla adam öldürmə) maddəsi ilə ittiham irəli sürülüb.