BAKI, 26 sentyabr. TELEQRAF

ABŞ-nin BMT-dəki daimi nümayəndəsi Mayk Uolts bildirib ki, ABŞ Prezidenti Donald Tramp və Konqres liderləri dizel yanacağı ixracına müvəqqəti qadağa qoyulması imkanlarını müzakirə edirlər.

Teleqraf xəbər verir ki, bu barədə "Fox News" məlumat yayıb.

"Düşünürəm ki, bu, hazırda Konqres liderləri və ABŞ Prezidenti Donald Tramp tərəfindən müzakirə olunur. Biz fermerlərimizə qayğı göstərəcəyik; onlar prezidentin diqqət mərkəzindədirlər", - deyə o, bildirib.

Uoltsın sözlərinə görə, bu, Hörmüz boğazında gəmiçiliyin pozulması ilə deyil, Ukrayna münaqişəsi ilə bağlıdır. "Traktorlarımızı, yük maşınlarımızı və iqtisadiyyatımızın əhəmiyyətli bir hissəsini idarə edən dizel problemi Hörmüz boğazında baş verənlərlə əlaqəli deyil. Hörmüz boğazından keçən neftin əhəmiyyətli bir hissəsi Asiyaya, böyük bir hissəsi isə Çinə göndərilirdi. Dizellə bağlı vəziyyət, əsasən Rusiya ilə Ukrayna arasındakı müharibədən təsirlənən neft emalı problemi ilə əlaqədardır və buna görə də prezident bütün tərəfləri neft emalı zavodlarına hücumu dayandırmağa çağırır", - amerikalı diplomat bildirib.

Qeyd edək ki, ABŞ-də rekord həddə çatan dizel yanacağının qiymətləri müşahidə olunur. Amerika Avtomobil Assosiasiyasının məlumatına görə, şənbə günü dizel yanacağının bir qallonunun orta qiyməti bir il əvvəlki 3,68 dollardan 6,48 dollara qədər artıb.