BAKI, 26 avqust. TELEQRAF
Ermənistanın keçmiş prezidenti Robert Köçəryanın böyük oğlu Sedrak Köçəryanın tərəfdarları İrəvanda Antikorrupsiya Məhkəməsinin binası qarşısına toplaşıblar.
Teleqraf xəbər verir ki, bu barədə TASS-ın İrəvandakı müxbiri məlumat yayıb.
Bildirilib ki, bir neçə onlarla insan Sedrak Köçəryan barəsində həbs qətimkan tədbirinin seçilməsi məsələsinə baxılan məhkəmənin qarşısına gəlib. Məhkəmə iclasının üç saatdan çoxdur davam etdiyi qeyd olunub.
Ermənistanın Antikorrupsiya Komitəsinin daha əvvəl yaydığı məlumata görə, xüsusilə külli miqdarda çirkli pulların yuyulması, vəzifə səlahiyyətlərindən sui-istifadə və külli miqdarda rüşvət alma faktları üzrə aparılan cinayət işi çərçivəsində avqustun 25-də saxlanılan altı nəfərin həbs edilməsi üçün məhkəməyə vəsatət təqdim olunub.
İstintaq çərçivəsində Robert Köçəryanın digər oğlu, “Ermənistan” fraksiyasının deputatı Levon Köçəryanın mənzilində, həmçinin Köçəryan ailəsi ilə əlaqəli şirkətlərdə axtarışlar aparılıb.
Qeyd edək ki, avqustun 25-də Ermənistan Baş Prokurorluğu Robert Köçəryan barəsində vəzifə səlahiyyətlərindən sui-istifadə, xüsusilə külli miqdarda rüşvət alma və çirkli pulların yuyulması ittihamları ilə cinayət işi başlandığını açıqlayıb.
İşdə Ermənistanın keçmiş prezidenti Serj Sarkisyanın da adı keçir. Sarkisyan Robert Köçəryanın prezidentliyi dövründə müdafiə naziri vəzifəsində çalışıb.
