BAKI, 19 avqust. TELEQRAF
ABŞ Prezidenti Donald Tramp Kanadanın bəzi məhsullarına tətbiq edilməsi nəzərdə tutulan 50 faizlik gömrük rüsumlarının qüvvəyə minməsini təxirə salmağı nəzərdən keçirir.
Teleqraf xəbər verir ki, bu barədə “Politico” mənbələrə istinadən məlumat yayıb.
Məlumata görə, ABŞ və Kanada bir neçə gündür genişmiqyaslı ticarət sazişinin bağlanması ilə bağlı danışıqlar aparır. Bununla belə, Vaşinqtonun birtərəfli tariflərinin çərşənbə günü qüvvəyə minib-minməyəcəyi Donald Trampın qərarından asılı olacaq.
Danışıqlar zamanı ABŞ Kanadadan Amerika spirtli içkilərinin idxalına qoyulan qadağanın aradan qaldırılmasını və ABŞ istehsalı avtomobillərə tətbiq edilən tariflərin ləğvini tələb edir. Ottawa isə öz növbəsində ABŞ-nin avtomobillərə və digər Kanada məhsullarına tətbiq etdiyi rüsumların azaldılmasına çalışır.
Mümkün razılaşma Kanadanın süd məhsullarına tətbiq etdiyi tarif kvotası ilə bağlı müəyyən güzəştləri də nəzərdə tutur. Tramp daha əvvəl də dəfələrlə bu istiqamətdə dəyişikliklərin edilməsini tələb edib.
Bununla yanaşı, avtomobil sənayesi iki ölkə arasındakı danışıqlarda əsas fikir ayrılığı olaraq qalır. “Politico”nun mənbələrinin məlumatına görə, Vaşinqton Kanadadan süd və meşə təsərrüfatı sektorlarını qoruyan bəzi proteksionist mexanizmləri də yumşaltmağı tələb edir.
Nəşr qeyd edir ki, yeni ABŞ rüsumlarının tətbiqi iki ölkə arasında təxminən 1 trilyon dollarlıq ticarəti əhatə edən daha geniş danışıqlara zərbə vura bilər.
Bundan başqa, yüksək tariflərin Kanada ilə həmsərhəd ABŞ ştatlarında iqtisadi problemlərə səbəb ola biləcəyi və bunun noyabrda keçiriləcək Konqresə aralıq seçkilərdə Respublikaçılar Partiyasının mövqelərinə təsir göstərə biləcəyi bildirilir.
