BAKI, 16 mart. TELEQRAF

Avropa İttifaqı Şurası 2022-ci ildə Rusiyanın işğalı zamanı Buçada mülki əhaliyə qarşı cinayətlərdə məsul olan 9 şəxsə qarşı məhdudlaşdırıcı tədbirlər görüb.

Teleqraf xəbər verir ki, bu barədə idarənin mətbuat xidməti məlumat yayıb.

"2022-ci ilin fevral-mart aylarında baş verən Buça qırğınının dördüncü ildönümü ilə əlaqədar olaraq, Aİ Şurası bu hadisələrdə əsas rol oynayan 9 şəxsə qarşı məhdudlaşdırıcı tədbirlər qəbul edib", - deyə məlumatda bildirilir.

Xüsusilə, sanksiya siyahısına Rusiya Şərq Hərbi Dairəsinin keçmiş komandanı və tammiqyaslı işğalın əvvəlində Ukrayna ərazisində ən yüksək rütbəli Rusiya hərbçisi general-polkovnik Aleksandr Çayko daxildir. O, ruslar Buçanı ələ keçirəndə Ukraynadakı Rusiya qüvvələrinin baş komandanı idi.

Siyahıda təcavüzün əvvəlində Ukraynadakı Rusiya qoşunlarına komandanlıq edən və Buça, Qostomel, İrpin və Borodyanka sakinlərinə qarşı vəhşiliklər törədən digər yüksək rütbəli hərbi məmurlar da var.

Hesabatda deyilir: "Onların komandanlığı altında olan qoşunlar talanlarda, işgəncələrdə iştirak edib və mülki şəxsləri ölən rus əsgərlərinin cəsədlərini çıxarmağa məcbur ediblər. Siyahıya daxil olan şəxslərdən biri həmçinin Rusiya tərəfindən işğal edilmiş Donetsk bölgəsindən qanunsuz olaraq Rusiyaya deportasiya edilmiş uşağı övladlığa götürməkdə də məsuliyyət daşıyır. 9 şəxs aktivlərinin dondurulmasına məruz qalır, Aİ vətəndaşlarına və şirkətlərinə onlara vəsait ayırmaq qadağandır və onların Aİ üzv dövlətlərinə daxil olmasına və ya tranzit keçməsinə qadağa qoyulur. Rusiyanın Ukraynaya qarşı davam edən təcavüzünə cavab olaraq bu cür məhdudlaşdırıcı tədbirlər hazırda təxminən 2600 şəxsə və təşkilata tətbiq olunur".