BAKI, 19 yanvar. TELEQRAF
Biz Suriyanı başda olmaqla coğrafiyamızın heç bir guşəsində müharibə, toqquşma və gərginlik görmək istəmirik.
Teleqraf xəbər verir ki, bunu Türkiyə Prezidenti Rəccəb Tayyib Ərdoğan deyib:
"Yeraltı və yerüstü sərvətlərimizin bundan sonra müharibə baronlarının ciblərinə axmasını istəmirik. Qardaşlarımız aclıq, qıtlıq və yoxsulluqla mübarizə apararkən, bir damla nefti tökülən insan qanından daha dəyərli sayan imperialist düşüncə tərzinin daha da güclənməsini istəmirik. Hamımız birlikdə qazanaq, işıqlı gələcəyimizi birlikdə quraq. Sülhün və sabitliyin hökm sürdüyü bir bölgədə yanaşı, əmin-amanlıq içində yaşamaq istəyirik".
Ərdoğan onu da qeyd edib ki, etnik mənsubiyyətindən asılı olmayaraq, bölgədə axan qanın dayanmasını, ölümlərin və qırğınların artıq sona çatması lazımdır: "Türk, kürd, ərəb, sünni, şiə ayrımı etmədən bir olmağı, iri olmağı, diri olmağı istəyir və bunun üçün səmimiyyətlə səy göstəririk. Terrordan azad Türkiyə prosesimizin məqsədi, hədəfi məhz budur".
