BAKI, 8 dekabr. TELEQRAF

ABŞ-nin Corciya ştatından Respublikaçı konqresmen Marjori Teylor Qrin beş il ərzində ofisinin 773-dən çox ölüm hədəsini hüquq-mühafizə orqanlarına bildirdiyini açıqlayıb. O, bunu prezident Donald Tramp ilə “Epstayn sənədləri” mövzusunda yaranmış açıq siyasi qarşıdurmadan sonra həm sol, həm də sağ dairələrdən gələn təzyiqlərlə izah edib.

Qrin bazar günü “X” sosial şəbəkəsində paylaşdığı uzun yazıda bildirib ki, əvvəlki hədələr əsasən “solçulardan” gəlirdisə, Epstaynla bağlı sənədlərin açıqlanmasına dair petisiyaya imza atdıqdan sonra Trampın onu “xain” adlandırması sağçı qruplardan gələn yeni hədələri artırıb.

Konqresmen daha əvvəl üçüncü müddətinə yenidən seçilsə də, Tramp ilə ciddi fikir ayrılığından sonra vaxtından əvvəl istefa qərarı verib. Trampın onu “Marjorie Traitor Green” ifadəsi ilə ictimai şəkildə hədəf alması Respublikaçı Partiyada nadir görünən böyük parçalanmanın əlaməti sayılır.

Qrin uzun müddət Trampın ən sədaqətli tərəfdarlarından, “America First” xəttinin əsas simalarından biri olub. Onun gedişi MAGA hərəkatında əhəmiyyətli itki kimi qiymətləndirilir.

Qrin yazır ki, ofisə daxil olan 773 ölüm hədəsini Kapitol polisində qeydə aldırıb. O və ailəsi onlayn şəkildə saysız-hesabsız hədəf alınıb. Ev ünvanını ifşa etmək üçün pizza sifarişləri göndərilib. Ofis bombalanacağı ilə bağlı “boru bombası” xəbərləri gəlib. Oğlunun öldürüləcəyi ilə bağlı sui-qəsd hədələri alıb.

Qrin yazıb ki, bu hədələri Trampa göndərib, lakin prezident sərt və ittihamedici reaksiyalar verib.