BAKI, 5 aprel. TELEQRAF
Ümumdünya Səhiyyə Təşkilatı (ÜST) ABŞ-nin quruma qayıtması ilə bağlı rəsmi danışıqlar aparır və Vaşinqtonun bu məsələdə mövqeyini dəyişəcəyinə ümid edir.
Teleqraf xəbər verir ki, bu barədə ÜST-ün Moskvadakı ofisinin rəhbəri Batır Berdıklyçev TASS agentliyinə müsahibəsində bildirib.
“ABŞ ilə bu məsələ ətrafında danışıqlar aparılır. Bunu pərdəarxası razılaşma kimi qiymətləndirmək olmaz, bu, olduqca açıq və konstruktiv dialoqdur. Ümid edirik ki, ABŞ mövqeyini yenidən nəzərdən keçirəcək. Çünki burada söhbət təkcə maliyyə dəstəyindən getmir, eyni zamanda ölkənin elmi və ekspert potensialı da nəzərə alınmalıdır”, - Berdıklyçev qeyd edib.
Onun sözlərinə görə, ABŞ bu günə qədər ÜST-ün ən böyük donorlarından biri olub və təşkilatın ümumi büdcəsinin təxminən beşdə birini təmin edib.
Təşkilat rəsmisi bildirib ki, Amerikanın təşkilatdan çıxmaq niyyəti ÜST-ün qlobal miqyasda həyata keçirdiyi proqramlara mənfi təsir göstərəcək: “Vaksinasiya, vərəm, malyariya, poliomielit və QİÇS-lə mübarizə kimi bir çox proqram artıq təhlükə altındadır. Bu səbəbdən ABŞ-nin qərarına təəssüf edirik, çünki bu yardımın dayandırılmasından ilk növbədə ən həssas əhali qrupları zərər görəcək”.
