BAKI, 4 aprel. TELEQRAF

NATO-nun Ukraynaya sülhməramlı qüvvələr göndərməsi mümkün deyil, çünki Rusiya buna qəti şəkildə qarşı çıxır.

Teleqraf xəbər verir ki, bunu Macarıstanın xarici işlər naziri Peter Siyarto Brüsseldə NATO xarici işlər nazirlərinin iki günlük iclasının yekununda bildirib.

"Bu məsələ, bəlkə də, gələcəkdə hansısa şəkildə həll edilə bilər, lakin indi bu barədə düşünmək doğru olmazdı", - nazir vurğulayıb.

Onun sözlərinə görə, Rusiya NATO ölkələrinin Ukraynaya sülhməramlı göndərməsinə qarşıdır və belə bir cəhd alyansla Moskvanı birbaşa toqquşmaya sürükləyə bilər: "Bu isə üçüncü dünya müharibəsinin başlanması demək olardı".

Siyarto əlavə edib ki, Ukraynada sülhməramlı qüvvələrin yerləşdirilməsi məsələsi yalnız atəşkəs barədə razılıq əldə olunduqdan və uzunmüddətli sülh sazişi üzrə danışıqlar başlandıqdan sonra müzakirə oluna bilər.