BAKI, 2 aprel. TELEQRAF

Apardığı qlobal ticarət müharibəsi ilə dünyanın siyasi və iqtisadi gündəmini dəyişən ABŞ Prezidenti Donald Tramp həm də hərbi müstəvidə addım atmağı planlaşdırır. Söhbət İrana hücumdan gedir.

Teleqraf xəbər verir ki, "Daily Mail"in müxbiri Dan Hodgesə görə, Birləşmiş Ştatlar və İsrail İrana bu ölkənin nüvə silahı proqramının yaratdığı təhlükəni həmişəlik aradan qaldırmaq üçün birgə hücuma hazırlaşır.

“İranın nüvə proqramına qarşı hərbi əməliyyat təhdidləri əvvəllər də səslənib. Amma indi etibarlı mənbələr ABŞ və İsrailin "qılıncları döymək"lə kifayətlənməyəcəklərini bildirirlər. Bir həftə əvvəl ABŞ Dieqo Qarsiyadakı Çaqos adalarındakı bazasına üç gizli "B2 Spirit" bombardmançı təyyarəsini yerləşdirdi və bu, onun ümumi bombardmançı qüvvələrini yeddiyə çatdırdı. Bu, nadir hadisədir”, - müəllif yazır.

Qeyd edək ki, martın 30-da ABŞ Prezidenti Donald Tramp İranın nüvə proqramı üzrə danışıqlarda irəliləyiş əldə olunmasa, iki həftə ərzində Tehrana ikinci dərəcəli tariflər tətbiq edəcəyini bəyan edib. O əlavə edib ki, saziş tamamilə rədd edilərsə, İslam Respublikası misli görünməmiş bombardmanlarla üzləşəcək.

Öz növbəsində İranın ali dini lideri Əli Xameneyi Trampın təhdidlərinə cavab verərək, ABŞ-nin hərbi müdaxilə ehtimalına inanmadığını bildirib. Onun sözlərinə görə, Vaşinqton İslam respublikasına hücuma cəhd etsə, sərt cavab alacaq.