BAKI, 29 iyul. TELEQRAF

Bu ilin ilk 6 ayında Azərbaycana digər ölkələrdən giriş edənlərin sayı ötən ilin müvafiq dövrü ilə müqayisədə azalıb.

Teleqraf xəbər verir ki, bunu Dövlət Miqrasiya Xidmətinin (DMX) rəisi Vüsal Hüseynov "Miqrasiya sahəsində media məlumatlılığı" mövzusunda mediaturda deyib.

O bildirib ki, ilin sonuna qədər bu statistika dəyişə bilər.

"Ölkəyə ən çox səfər edən vətəndaşların mənsub olduqları ilk beş ölkə Rusiya Federasiyası, Türkiyə Respublikası, Gürcüstan, İran İslam Respublikası və Qazaxıstan Respublikası olub".

O qeyd edib ki, bu ilin ilk 6 ayında ölkəyə 192 ölkənin vətəndaşı tərəfindən ümumilikdə 1.091.865 giriş qeydə alınıb. Birləşmiş Ərəb Əmirlikləri (BƏƏ), Səudiyyə Ərəbistanı, Küveyt, Oman, Hindistan, Cənubi Asiya vətəndaşlarının səfərlərində isə kəskin azalma var.

Vüsal Hüseynov həmçinin DMX-nin daxili rəqəmsallaşma göstəricilərini də diqqətə çatdırıb.

O bildirilib ki, cari ilin ilk 6 ayı ərzində Xidmətə müxtəlif istiqamətlər üzrə 420.961 müraciət daxil olub, onların 55.8%-i məhz elektron qaydada qəbul edilib.

Xidmət rəisi vurğulayıb ki, elektron müraciətlərin 69,8%-i üzrə müraciət müəllifləri öz müraciətlərinin cavabını və nəticəsini sistem vasitəsilə tam rəqəmsal, real vaxt rejimində əldə edə biliblər.