BAKI, 16 iyul. TELEQRAF

Mayın 15-də keçirilən dövlət qulluğuna qəbul imtahanlarında uğur əldə edən şəxslərin sertifikatlarının verilməsinə başlanılıb.

Teleqraf xəbər verir ki, bu barədə Dövlət İmtahan Mərkəzi məlumat yayıb.

Bildirilib ki, dövlət qulluğunun A (inzibati rəhbər) və B (inzibati icraçı) növlərinə aid vəzifələrin tutulması məqsədilə keçirilmiş test imtahanında uğur qazanaraq sertifikat əldə etmək üçün müraciət etmiş və müraciətinə DİM tərəfindən razılıq verilmiş şəxslər sertifikatlarını şəxsiyyəti təsdiq edən sənədi təqdim etməklə Dövlət İmtahan Mərkəzinin Bakı şəhəri, Binəqədi rayonu, Süleyman Sani Axundov küçəsi. 50 ünvanında yerləşən elektron imtahanlar korpusundan əldə edə bilərlər.

Qeyd edilib ki, sertifikatı DİM-in Naxçıvan, Gəncə, Şəki, Lənkəran, Şirvan, Göyçay, Bərdə, Xaçmaz, Şəmkir regional bölmələrindən əldə etmək üçün [email protected] elektron poçt ünvanına müraciət edilməli və ərizəyə şəxsiyyəti təsdiq edən sənədin surəti də əlavə edilməlidir.