BAKI, 1 iyul. TELEQRAF
“İƏT Həftəsi” çərçivəsində İqtisadi Əməkdaşlıq Təşkilatının Gənclər Forumunun nümayəndə heyəti Ağdama səfər edib.
Teleqraf xəbər verir ki, bu barədə Gənclər və İdman Nazirliyi məlumat yayıb.
Məlumata görə, İqtisadi Əməkdaşlıq Təşkilatının (İƏT) Gənclər Forumunda iştirak edən nümayəndə heyəti Ağdam şəhərinə yollanıb.
7 ölkədən 100-dən artıq nümayəndə heyəti işğaldan azad olunmuş Ağdam şəhərində həyata keçirilən genişmiqyaslı bərpa və quruculuq işləri ilə yaxından tanış olub.
Ekskursiya çərçivəsində qonaqlar Ağdam Dəmir Yolu və Avtovağzal Kompleksi, Ağdam Muğam Mərkəzi və tarixi Ağdam Cümə Məscidini ziyarət ediblər.
Nümayəndələr şəhərin keçmişi və yenidən qurulan gələcəyi barədə ətraflı məlumat əldə ediblər.
Səfərin sonunda iştirakçılar üçün Azərbaycan mədəniyyətini əks etdirən ziyafət və mədəni-əyləncəli proqram təşkil olunub.
