BAKI, 26 fevral. TELEQRAF

"Azərbaycan xalqı son 200 il ərzində erməni millətçi-şovinistlərinin davamlı olaraq etnik təmizləmə, soyqırımı siyasətinə məruz qalıb. Azərbaycan xalqı tarixi torpaqlarından qovulub, qaçqına, məcburi köçkünə çevrilib və bütün bunlar ermənilər tərəfindən kütləvi qırğınlarla müşayiət olunub. Azərbaycanlılara qarşı ermənilərin törətdikləri terror aktlarından biri də Xocalıda həyata keçirilib. “Bu soyqırımı, eyni zamanda, bütün bəşəriyyətə qarşı tarixi bir cinayətdir”, - deyən Ulu Öndər Heydər Əliyevin təşəbbüsü ilə 1994-cü il fevralın 24-də Milli Məclis “Xocalı soyqırımı günü haqqında” qərar qəbul etdi. Ümummilli Liderin 1997-ci il tarixli Sərəncamı ilə hər il fevral ayının 26-sı saat 17.00-da Azərbaycan ərazisində Xocalı soyqırımı qurbanlarının xatirəsinə ehtiram əlaməti olaraq sükut dəqiqəsi elan edilib".

Teleqraf xəbər verir ki, bu fikirləri açıqlamasında Milli Məclisin Ailə, qadın və uşaq məsələləri komitəsinin sədri, professor Hicran Hüseynova deyib.

Onun sözlərinə görə, Xocalı qatili Serjik Sarkisyanın “Xocalıya qədər azərbaycanlılar bizimlə sadəcə zarafat etdiklərini düşünürdülər" fikirlərini oxuyanda, bir daha ermənilərin əsl simasını görmək mümkün olur: "Onlar heç bir beynəlxalq hüquq və normaya, Konvensiyalara əməl etmirlər. İnsanlığa qarşı törədilmiş bu dəhşətli cinayət əməli nəticəsində 613 nəfər dinc azərbaycanlı qətlə yetirilib, onlardan 63-ü uşaq, 106-sı qadın, 70-i qoca olub. Eyni zamanda, 487 nəfər dinc sakin ağır yaralanıb, 1275 nəfər girov götürülüb. Girov götürülən 150 nəfərin, o cümlədən 68 qadının və 26 uşağın taleyi hələ də məlum deyil. Soyqırımı zamanı 56 nəfər xüsusi qəddarlıqla öldürülüb, 8 ailə tamamilə məhv edilib, 25 uşaq hər iki valideynini, 130 uşaq valideynlərindən birini itirib. Lakin qeyd edim ki, sonra araşdırmalar zamanı məlum oldu ki, həlak olan uşaqların sayı 76-dır.

Xocalı soyqırımını törədən erməni cinayətkarlar beynəlxalq hüquqi aktları BMT-nin «Uşaq hüquqları haqqında» Konvensiyasını, "Müharibə zamanı mülki şəxslərin müdafiəsinə dair" IV Cenevrə Konvensiyasını, Birləşmiş Millətlər Təşkilatının “Ümumdünya İnsan Haqları Bəyannaməsi” ni, “Vətəndaş və siyasi hüquqlar haqqında” Beynəlxalq Paktı, "Genosid cinayətinin qarşısının alınması və cəzalandırılması haqqında" Konvensiyanı, “Fövqəladə vəziyyətlərdə və hərbi münaqişələr zamanı qadınların və uşaqların müdafiəsi” Bəyannaməsini, eləcə də digər beynəlxalq norma və prinsipləri kobud surətdə pozub".

Professor vurğulayıb ki, vaxtı ilə Ermənistan tərəfi diasporun və kilsənin maliyyə və ideoloji dəstəyi ilə beynəlxalq ictimaiyyəti dezinformasiya etmək üçün bir proqram başlatdı: "Lakin onlar uğursuz oldular. Azərbaycan saxtakarları və onların yalanlarını tamamilə ifşa etdi. Heydər Əliyev Fondunun vitse-prezidenti Leyla Əliyevanın təşəbbüsü ilə təşkil edilən beynəlxalq "Xocalıya ədalət" kampaniyası böyük rol oynadı. Bu böhtan xarakterli müharibəni başlayanlar məğlub oldular və güclü əks-hücuma məruz qaldılar ki, bunun sayəsində dünya Xocalı haqqında həqiqəti öyrəndi. Fondun “Xocalıya ədalət” kampaniyasını 100 minlərlə şəxs və 115 təşkilat kampaniyanın fəaliyyətini dəstəkləyir. Sosial şəbəkələrdə təşviqat, sərgilər, toplantılar, müsabiqələr, konfranslar, seminarlar və digər tədbirlər kampaniyanın məqsədlərinə çatmaq üçün istifadə olunan səmərəli vasitələri təşkil edir.

Təcrübə göstərir ki, vahid informasiya sistemini qurulması və davamlı şəkildə təbliğ-təşviqat layihələrinin keçirilməsi çox müsbət nəticə verir. Bizim informasiya müharibəsində uduzmağa haqqımız yoxdur. Dünyanın müxtəlif ölkələrində yaşayan azərbaycanlıların fəaliyyətini də qeyd etmək lazımdır. Orada yaşayan, təhsil almağa, işləməyə gedən azərbaycanlılar könüllü şəkildə, vətənpərvərlik hissi ilə Azərbaycanla bağlı əsl həqiqətləri çatdırır, bunla bağlı layihələr həyata keçirirlər. Biz bu insanlarla sıx təmas saxlamalıyıq. Bizi müdafiə edən, haqlı olduğumuzu dəstəkləyən xarici alimlərlə, diplomatlarla, etnoqraflarla əməkdaşlığı daha da gücləndirməliyik. Müvafiq qurumlar çalışmalıdır ki, həqiqətən Vətənini sevən, onun inkişafına çalışan, haqlı mübarizəsinə dəstək verən diaspor nümayəndələri, ayrı-ayrı ölkələrin bələdiyyə, parlament, hökumət səviyyəsində təmsil olunsunlar, Azərbaycanı təbliğ etməkdə daha çox töhfə versinlər. Ümumiyyətlə, bizim hər birimiz öz səlahiyyətlərimiz daxilində beynəlxalq təşkilatlara və dünya ölkələrinə beynəlxalq hüquqi normalara riayət edilməsi, sülhün və təhlükəsizliyin müdafiə edilməsi, BMT-nin qətnamələrinə əməl edilməsi və Ermənistanın işğalçı siyasətinin acı və dağıdıcı nəticələri haqqında təbliğat işlərini daha da gücləndirməliyik. Bu, davamlı və ardıcıl şəkildə aparılmalıdır. Nüfuzlu alimlərin, siyasətçilərin, diplomatların iştirakı ilə beynəlxalq konfranslar, forumlar təşkil edilməli, Xocalı soyqırımı eləcə də Ermənistan hərbi-siyasi rəhbərliyinin azərbaycanlılara qarşı törətdiyi digər cinayətlər haqqında məqalə və kitablar yazan bir sıra xarici jurnalist və yazıçıları belə layihələrə cəlb etməliyik. Həmin tədbirləri Qarabağda, Şərqi Zəngəzurda keçirməliyik. İştirakçıları tapılmış kütləvi məzarlıqlarla tanış etməliyik".

Hicran Hüsyenova bildirib ki, artıq torpaqlarımız erməni işğalından azaddır: "2020-ci il Vətən müharibəsində Azərbaycan Ordusu 30 il işğal altında qalan torpaqlarımızı azad etməklə yeni reallıq yaratdı, 44 günlük müharibədə misilsiz igidlik nümunələri göstərən qəhrəman ordumuz Müzəffər Ali Baş Komandanın rəhbərliyi ilə Xocalı faciəsi qurbanlarının da qisasını aldı, şəhidlərimizin qanı yerdə qalmadı. Xocalı şəhəri 2023-cü il sentyabrın 19-20-də Azərbaycan Ordusunun Qarabağda keçirdiyi lokal xarakterli antiterror tədbirləri nəticəsində separatçılardan təmizlənib. Prezident İlham Əliyev 2023-cü il oktyabrın 15-də Xocalı şəhərində Dövlət Bayrağını ucaldıb, 2024-cü il fevralın 26-da Xocalı şəhərində Xocalı Soyqırımı Memorialının təməlini qoyub. İndi Xocalı azaddır, Xocalıda həyat canlanır. Sülh gündəliyi Azərbaycanın Ermənistana etdiyi böyük bir yaxşılıqdır. Bu, regionda sülh naminə edilir və heç bir şəkildə bağışlanma və ya son otuz ilin xatirəsinin silinməsi demək deyil. Bu xatirə nəsildən-nəslə ötürüləcəkdir. Tarixi yaddaşı və sayıqlığı qorumadan əsl sülh mümkün deyil. Bu, hər kəsin bu cür faciələrin təkrarlanmasının qarşısını almaq üçün bilməli olduğu tarixdir. Bu faciələr unudulmayacaq, onlar tariximizin bir hissəsidir. Əksinə, həm Xocalı, həm də digər faciələrimiz yenidən araşdırılır, yeni faktlar ortaya çıxır və azad edilmiş torpaqlarda getdikcə daha çox kütləvi məzarlıqlar aşkar edilir. Bunu, hətta sülh naminə belə, unuda bilərikmi? Xeyr!"