BAKI, 23 oktyabr. TELEQRAF
ABŞ Prezidenti Donald Tramp hesab edir ki, Nümayəndələr Palatasının üzvü İlhan Ömər (Demokratlar Partiyasından) əsl adından fərqli bir adla and içdiyinə görə Konqresdən istefa verməlidir.
Teleqraf xəbər verir ki, Trampın sözlərinə görə, konqresmen xanımın əsl adı İlhan Nur Səid Elmidir. "Vəzifə andı içmək üçün saxta addan istifadə etdiyinə görə, inanıram ki, o, dərhal Konqresdən istefa verməlidir", - deyə Tramp "Truth Social"da yazıb.
Bu, Trampın Ömərə qarşı ilk hücumu deyil. Ötən həftə Ağ Ev Ədliyyə Nazirliyinin Ömərə qarşı araşdırma apardığını təsdiqləyib. "The Wall Street Journal" mənbələrə istinadən bildirib ki, araşdırmanın məqsədi onu vətəndaşlığından məhrum etmək və sonradan deportasiya etmək üçün dəlil toplamaqdır.
Qanunverici Tramp administrasiyasını siyasi rəqiblərini qorxutmağa çalışmaqda günahlandırıb.
Ömər qarşıdan gələn ABŞ qanunvericilik seçkilərində ABŞ Konqresinin aşağı palatasına yenidən seçilmək istəyir. ABŞ-da ara seçkilər 3 noyabrda keçiriləcək. Senatın üçdə biri və bütün Nümayəndələr Palatasının yenidən seçiləcəyi gözlənilir. Hər iki palata hazırda Respublikaçılar Partiyasının nəzarətindədir.
