BAKI, 2 may. TELEQRAF
Qazaxıstan hakimiyyəti Polşa ərazisində saxlanılan vətəndaşının azadlığa buraxıldığını təsdiqləyib.
Teleqraf xəbər verir ki, bu barədə Qazaxıstan Prezidentinin müşaviri – mətbuat katibi Aibek Smadiyarov öz “Telegram” kanalında məlumat verib.
“Bildiyiniz kimi, bu ilin 28 aprelində əvvəllər Polşa ərazisində saxlanılan Qazaxıstan vətəndaşı azad edilib. Azad olunma dövlət başçısı Kasım-Jomart Tokayevin şəxsi səyləri sayəsində mümkün olub”, – deyə Smadiyarov bildirib.
Azad edilən şəxsin kimliyi açıqlanmayıb.
Qeyd olunub ki, Prezident Tokayev bu məsələdə göstərilən dəstəyə görə Belarus və Rusiya liderləri Aleksandr Lukaşenko və Vladimir Putinə təşəkkürünü bildirib.
