BAKI, 28 aprel. TELEQRAF
ABŞ İranın vəsaitlərinin leqallaşdırılmasında rol oynayan 17 şəxsə və 18 şirkətə qarşı sanksiyalar tətbiq edib.
Teleqraf xəbər verir ki, bu barədə ABŞ Maliyyə Nazirliyinin yaydığı bəyanatda bildirilib.
Sanksiyaya məruz qalan şəxslər və qurumlar İran hərbi liderlərinə qanunsuz neft satışından və silahlar üçün həssas komponentlərin əldə edilməsindən vəsait əldə etmək üçün beynəlxalq maliyyə sisteminə çıxış imkanı veriblər.
ABŞ maliyyə naziri Skott Bessent "qlobal ticarəti pozmaq" üçün istifadə edilən "İranın kölgə bank sistemi"nin mövcudluğunu diqqətə çatdırıb.
O, bu sistemə kömək edən hər hansı bir qurumun ciddi təzyiqlərə məruz qalacağını bildirib.
ABŞ Maliyyə Nazirliyinin saytında yerləşdirilən məlumatlara görə, 16 İran vətəndaşı və bir filippinliyə qarşı sanksiyalar tətbiq edilib. Sanksiya siyahılarına İran, Honkonq və Böyük Britaniyada yerləşən şirkətlər daxildir.
