BAKI, 30 aprel. TELEQRAF.
Moskva vilayətinin Krasnoqorsk şəhərindəki “Krokus Siti” konsert zalına hücumda təqsirləndirilən 4 nəfərin işi iyunun ortalarında baxılması üçün məhkəməyə veriləcək.
Teleqraf xəbər verir ki, bu barədə Rusiyanın hüquq-mühafizə orqanları məlumat verib.
Mənbə bildirib: "İşlə bağlı çoxlu materiallar, o cümlədən "Krokusa" hücum şəraiti ilə bağlı məlumatlar var. Onlara baxıldıqdan sonra iş prokurorluğa, sonra isə məhkəməyə veriləcək. Yəqin ki, məhkəmə iyunun ortalarında başlayacaq".
Onun sözlərinə görə, işə 2-ci Qərb Dairə Hərbi Məhkəməsində baxılacaq.
2024-cü il martın 22-də axşam saatlarında Moskva vilayətinin Krasnoqorsk şəhərindəki “Krokus” konsert zalında terror aktı törədilib. 6-sı uşaq olmaqla 145 nəfər həlak olub, 500-dən çox insan yaralanıb. İstintaqın məlumatına görə, iş üzrə 27 təqsirləndirilən şəxs, o cümlədən dörd birbaşa təqsirkar - Dalerjon Mirzoyev, Murodal Raçabalizoda, Muhammadsobir Fayzov və Şəmsidin Fəriduni həbs edilib.
