BAKI, 28 dekabr. TELEQRAF
ABŞ-nin Nyu-Cersi ştatının Hammonton şəhərində iki helikopter havada toqquşaraq qəzaya uğrayıb.
Teleqraf xəbər verir ki, bu barədə "New York Post" nəşri məlumat yayıb.
ABŞ Federal Aviasiya Administrasiyasının (FAA) bildirdiyinə görə, "Enstrom F-28A" və "Enstrom 280C" tipli helikopterlər Hammonton bələdiyyə aeroportu yaxınlığında havada toqquşub. Helikopterlərdən biri meşəlik əraziyə, digəri isə şəhər ərazisinə düşüb. Qəza yerində qara tüstü sütununun qalxdığı müşahidə olunub.
Məlumata əsasən, helikopterlərin hər birində yalnız pilot olub. Hadisə nəticəsində azı bir nəfər ölüb, bir nəfər isə xəsarət alıb.
