BAKI, 5 aprel. TELEQRAF

Bura bir zamanlar on minlərlə tələbəsi olan bir universitet idi. Ancaq universitet qanunsuz tələbə qəbulunun mərkəzinə çevrilmişdi. Abituriyentlərin mütləq əksəriyyəti komik miqdarda bal toplasalar belə, bu, onların Azərbaycan Beynəlxalq Universitetində (ABU) tələbə adını qazanmağına mane olmurdu. 2010-cu ildə Təhsil Nazirliyi məsələni nəzarətə götürdü, bu təhsil ocağına 2005-ci ildə 5 illiyə verilmiş lisenziyanın müddətini uzatmadı. Beləliklə, 1997-ci ildə fəaliyyətə başlamış universitetin ömrü başa çatdı.

O vaxtkı Tələbə Qəbulu üzrə Dövlət Komisiyasının (indiki Dövlət İmtahan Mərkəzi) xətti ilə universitetə qəbul olunmayan minlərlə tələbə diplomsuz qaldı. Universitetin rektoru Elşad Abdullayev Fransaya mühacirət etdi.

Universitetin yerləşdiyi ərazi isə "Bakı Metropoliteni"nə məxsusdur.

Məlumatlara görə, “Dərnəgül" elektrik deposunun tikintisi səbəbindən ərazidən təxminən, 464 yaşıllıq köçürüləcək, ABU-nun binası isə söküləcək.

On beş ildir ki, boş qalan universitetin binası bu gün xarabalığı xatırladır.

Ərazidə bir neçə it sürüsü özünə məskən salıb.

Əraziyə yaxınlaşmaq foto-video çəkilişi aparmaq, reportaj hazırlamaq həyat üçün təhlükəlidir.

Ancaq bütün bu çətinliklərə baxmayaraq, ərazidən material hazırlamaq mümkün olub.

Teleqraf universitetin ərazisindən foto-video reportajı təqdim edir.