KƏLBƏCƏR, 2 aprel. TELEQRAF

Bu gün işğaldan azad olunan Kəlbəcər intibah dövrünü yaşayır. İşğal dövrünün erməni vandalizminin izləri ata-baba torpaqlarımızdan silinir, rayonun qəsəbə və kəndləri yenidən qurulur.

Kəlbəcər şəhərinin birinci yaşayış məhəlləsində ümumi sahəsi 8,7 hektar olan 524 mənzildən ibarət bina və “townhouse” tipli evlər yer alıb. Ölkə başçısı tərəfindən təməli qoyulan Kəlbəcər şəhəri ikinci yaşayış məhəlləsinin ümumi sahəsi 1,76 hektardır. Bu layihədə isə 160 mənzildən ibarət yaşayış binaları yer alıb. Kəlbəcər şəhərində inzibati bina üçün ayrılan ərazinin sahəsi 2,42 hektar, şəhər parkı üçün ayrılan ərazi isə 10,9 hektar təşkil edəcəkdir.

Rayon mərkəzi ilə yanaşı, İstisu qəsəbəsində 159 fərdi yaşayış evin inşası nəzərdə tutulub. İnşası davam edən “İstisu" Müalicə-İstirahət Kompleksi 34 hektar ərazidə inşa olunacaq. Bu kompleksdə otel, restoran, kafe, kottec, inzibati bina, multifunksional konfrans zalı, əyləncə məkanları, açıq və qapalı hovuzların inşası planlaşdırılır.

Yaxın zamanlarda Zar, Zallar və Yanşaq kəndlərində tikinti işlərinə start verilməsi gözlənilir. Kəlbəcər Şəhər Təhsil Kompleksində 528 şagirdlik ümumtəhsil orta məktəbin, 80 yerlik uşaq bağçasının, 7 peşə təhsili üzrə emalatxananın və 70 yerlik yataqxananın tikintisinin davam edir. Bu işlərin növbəti ildə tamamlanması gözlənilir.

145 otaqdan ibarət olacaq oteldə 420 nəfərin istirahəti üçün şərait yaradılacaq. Kəlbəcərdə İşğal və Zəfər Muzeyləri kompleksi layihəsinin həyata keçirilməsi də nəzərdə tutulub.