BAKI, 3 aprel. TELEQRAF

Aprelin 23–də Monteneqronun paytaxtı Podqoritsada start götürəcək cüdo üzrə Avropa çempionatı üçün Azərbaycan milli komandasının heyəti açıqlanıb.

Federasiyanın mətbuat xidmətindən Teleqraf-a verilən məlumata görə, dörd gün davam edəcək çempionatda Azərbaycanı fərdi yarışlarda 12 çəki dərəcəsində ümumilikdə 16 cüdoçu (9 kişi, 7 qadın) təmsil edəcək.

Azərbaycan Avropa çempionatları tarixində ilk dəfə böyüklər arasında qarışıq komanda yarışında da iştirak edəcək. Həmçinin, olimpiya çempionları Hidayət Heydərov və Zelim Kotsoyev Paris-2024 Yay Olimpiya Oyunlarından sonra ilk dəfə tatami üzərinə çıxacaqlar.

Milli komandanın üzvləri performans direktor və böyüklərdən ibarət yığmanın baş məşqçisi Riçard Trautman, böyük məşqçilər Elçin İsmayılov, Robert Kravçik və Slavko Tekiç, qadınlardan ibarət yığmanın baş məşqçisi Amina Abdullatif və məşqçi Saşa Herkenrat-Vimarın rəhbərliyi ilə tatamiyə çıxacaqlar.

Kişilərin mübarizəsinə Əhməd Yusifov, Turan Bayramov (hər ikisi 60 kq), Ruslan Paşayev (66 kq), Hidayət Heydərov (73 kq), Zelim Tçkayev, Ömər Rəcəbli (hər ikisi 81 kq), Zelim Kotsoyev (100 kq), Uşanqi Kokauri (+100 kq) qatılacağı dəqiqləşib.

90 kq çəki dərəcəsində iştirakçı Dubrovnikdə keçiriləcək Avropa Kubokundan sonra müəyyənləşəcək.

Vüsal Qələndərzadə isə 73 kq çəki dərəcəsində qarışıq komanda yarışlarında heyətə qoşulacaq.

Qadınların yarışında Könül Əliyeva (48 kq), Aydan Vəliyeva, Gültac Məmmədəliyeva (hər ikisi 52 kq), Fidan Əlizadə (57 kq), Günel Həsənli, Südabə Ağayeva (hər ikisi 70 kq), Nigar Süleymanova (+78 kq) yer alacaq.

Qeyd edək ki, Avropa çempionatının ilk 3 günündə fərdi, sonuncu günündə qarışıq komanda yarışları təşkil olunacaq.