BAKI, 3 aprel. TELEQRAF

Pəncəli Teymurov - adını Azərbaycan xalqının heç vaxt unutmayacağı bir qəhrəman. "Qoca qurd" ləqəbi ilə tanınan bu igid döyüşçü, həm döyüşlərdəki şücaəti, həm də vətənə olan dərin sevgisi ilə xalqımızın yaddaşında əbədi iz qoydu. 2016-cı ilin Aprel döyüşlərindəki qəhrəmanlığı ilə tanınan Pəncəli Teymurov özünü yalnız bir əsgər deyil, vətənin müdafiəçisi kimi tanıtdı. Düşmənin hər təxribatına qarşı duraraq, nəinki öz həyatını, həm də Azərbaycanın gələcəyini qorumaq üçün mübarizə apardı. Onun adı, əfsanəvi bir döyüşçünün simvolu olaraq, qəhrəmanlıq və vətənpərvərlik təcəssümüdür. Bu gün Aprel döyüşlərindən 9 il ötsə də, bu döyüşlərdə iştirak edən digər Vətən oğulları ilə yanaşı, Pəncəli Teymurov da unudulmur, xatirəsi daim ürəklərdə yaşayır.

2016-cı ilin aprel ayında cəbhə xəttində Ermənistan silahlı qüvvələrinin təxribatının qarşısını almaqdan ötrü döyüş meydanına atılanlardan biri də Xüsusi Təyinatlıların əfsanəvi giziri, şəhid Pəncəli Teymurov idi.

Bəli, 35 yaşlı Pəncəlinin də əsil qəhrəmanlıq göstərdiyi Aprel döyüşlərindən hələ çox danışılacaq. Dörd gün davam edən bu döyüşlər zamanı Azərbaycan Ordusu böyük şücaət və qəhrəmanlıq sərgilədi, düşmənə sarsıdıcı zərbələr vurdu. Bu döyüşlərdə şəhid olan igid əsgərlər, gizirlər və zabitlərimizin qəhrəmanlıqları xalqımızın yaddaşına əbədi həkk edildi. Bu savaş yalnız hərbi qələbə deyil, həm də xalqımızın birlik və vətənpərvərlik ruhunun təzahürü idi. Bu qələbə həm də 44 günlük Vətən müharibəsində qazandığımız tarixi Zəfərin təməlini qoydu.

Teleqraf-ın Cənub bürosunun əməkdaşı Pəncəli Teymurovun keçdiyi döyüş yolu barədə daha ətraflı məlumat əldə etmək üçün şəhidin anası Vahimə Ağayeva və kiçik qardaşı Famil Teymurovla həmsöhbət olub.

Pəncəlinin uşaqlıqdan cəsur, çox cəngavər biri olduğunu söyləyən şəhidin anası Vahimə Ağayeva deyib: "Biz onu hərbi xidmətə yola saldıq, 11 ay hərbi xidmətdə oldu, sonra onu evə göndərdilər. Gəldi evə, sənədlərini yığışdırıb götürdü və dedi ki, mən gedirəm, hərbidə qalacağam. O gedən idi, getdi. Həqiqətən, mən Pəncəlini şəhid olduqdan sonra tanımışam. Sağlığında biz onun haqqında bir kəlmə söz eşitmədik. Amma o şəhid olduqdan sonra, igidliyini, onun bu Azərbaycan xalqı üçün, bu dövlət üçün, bu torpaq üçün nələr etdiyini eşidəndə, həqiqətən, mən oğlum ilə qürur duydum".

Vahimə ana Pəncəli üçün toy hazırlıqları barədə maraqlı xatirəni də bölüşüb: "Bir gün mən oğlanlarımdan birinə dedim ki, bala, Pəncəli 33 yaşına çatıb, onun üçün toy edək, siz onun üçün müğənni gətirin, onun toyu yadigar qalsın. Uşaqlar mənə dedilər ki, ana, sən niyə elə deyirsən ki, toydur edərik də, yadigar nə sözdür ki? Pəncəli şəhid olduqdan sonra uşaqlar dedilər ki, ana, sən nə bilirdin ki, Pəncəli şəhid olacaq, onun toyu yadigar qalacaq? Onun toyu, elə toyunda o dediyi sözlərlə yadigar qaldı. Hansı ki, müğənni Manaf Ağayev mikrafonu ona verdi, o şəhidliyi özünə arzu etdi. Toyxanada nə qədər adam var idi, onun o sözlərinə, o danışığına, o səsinə təəccübləndilər. Bu necə olacaq, bu cavan özünə nə arzu edir? Onun fikri- zikri dövləti qorumaq, torpaqları almaq idi. Ayın 2-sindən 3-nə keçən gecə Pəncəli şəhid olmuşdu. Biz isə ayın 10-u xəbər tutduq. Ayın 10-u axşamçağı bizə xəbər çatdı ki, Pəncəli də şəhid olub. Səhərisi gün saat 11-də hamı, hərbiçilər onun tabutunu gətirdilər. Bizə dedilər ki, anası ilə bacıları görüb pis olarlar, qışqırarlar deyə, onlar meyitə baxmasınlar. Atası və qardaşları gedib yolda Pəncəlinin nəşinə baxsınlar. Amma mən dedim ki, siz gedin, ağsaqqallara deyin, mən bir ana kimi öz oğlumu tanıyaram. Öz oğluma baxmasam, narahat olaram. Gətirdilər, baxdım, gördüm, həqiqətən Pəncəlidir. Arzu edirəm ki, Azərbaycana həmişə Pəncəli kimi igidlər xidmət etsin, Pəncəli kimi igidlər Vətəni qorusunlar. Azərbaycan Prezidenti, Ali Baş Komandan İlham Əliyevin 2015-ci ildə imzaladığı sərəncamla Pəncəli Teymurov “İgidliyə görə” medalı ilə təltif olunub. Şəhidimizin 3 mərasimində iştirak edən o vaxt Xüsusi Təyinatlı Qüvvələrin komandanı Hikmət Mirzəyev yas mərasimində iştirak edən təxminən 500 nəfərin qarşısında demişdi ki, Pəncəli Teymurov Azərbaycan Xüsusi Təyinatlılarının onurğa sütunu idi".

Şəhidin ailə üzvləri ilə söhbət zamanı o da məlum olub ki, onlar sonuncu dəfə Pəncəli ilə 2016-cı il martın 24-də onun 35 yaşı tamam olanda danışıblar. Pəncəli həmişə qardaşlarına: “Mən təqaüdə çıxsam nə edəcəyəm? Hərbisiz yaşaya bilmərəm” - deyərmiş.

Şəhidin kiçik qardaşı Famil Teymurov Pəncəli ilə bağlı uşaqlıq xatirlərini danışıb, onun arzuları barədə məlumat verib. Bildirib ki, hələ uşaqlıqda onlar qardaşı ilə bir yerdə oynadıqları vaxtlar həmişə Pəncəli Xocalı haqqında AzTV-dəki verlişləri izləyib deyirmiş: ‘Mən Xocalıda qətlə yetirilən, o donmuş uşaqların, o ahılların qisasını alacağam".

Pəncəlinin haradasa Xüsusi Təyinatlı Qüvvələrdə kəşfiyyatçı kimi xidmət etdiyini söyləyən Famil qeyd edib: "Açığını deyim ki, o qədər də bilmirdik ki, o, hansı işlərlə məşğuldur. Qardaşım kəşfiyyata gedən zaman Xocalıda qətliam törədən bir polkovniki zərəsizləşdirib. Sonradan biliblər ki, həmin polkovnik general rütbəsinin təqdimatına gedirmiş. İzləmə aparıblar, bir "UAZ" gəlir, onu uzaqdan vurub zərəsizləşdirmişdilər. Bir dəfə əməliyyatda olduğu zaman, 12 nəfərlik bir heyətlə Kəlbəcər istiqamətinə gedirmişlər, amma mühasirəyə düşürlər. Onlar mühasirəyə düşəndə, qardaşım gecə vaxtı öz döyüş yoldaşlarının çoxunu oradan təxliyə edir. Yoldaşları çıxandan sonra özü tək olaraq 21 gün Böyürtkən kolunun içində qalmışdı, elə bilmişdilər ki, o ölüb və nəşi düşmən tərəfdə qalıb. Deyirlər, sonradan o gəldi, gördük sağ-salamatdır. Amma saqqal basmışdı. Bir dəfə də kəşfiyyata gedəndə hiss ediblər ki, qabaqda düşmən var. İşıq düşməsin deyə, siqareti əlində sıxıb saxlayıb. Əlcəyi də yanmışdı. Hazırda həmin əlcəyi sübut kimi ev-muzeyində qoruyub saxlayırıq".

Pəncəli Teymurov bir dəfə özü belə demişdi: “Mən bunu sidq ürəklə deyirəm. Hər zaman xalqım üçün, vətənim üçün, torpağım üçün canımdan, qanımdan keçməyə hazıram. Həmişə özümə arzu etmişəm ki, Vətənim üçün şəhid olum, Azərbaycan Respublikasının üç rəngli Ay-ulduzlu bayrağı ilə bükülüb, tabutum dəfn olunmağa getsin".

Pəncəli Teymurov və onun timsalında Vətən torpaqları uğurunda canından keçən hər bir qəhərman şəhidimiz əbədi olaraq yaddaşlarda qalacaq.

Onlar daim şücaət və cəsarət simvolu olacaq, Azərbaycan xalqının qüruru və vətənpərvərlik rəmzi kimi xatırlanacaqlar.