Moldova SSRİ-dən çıxsa da, SSRİ hələ də Moldovadan çıxmayıb.

Axar.az xəbər verir ki, bunu Buxarest Universitetində keçirilən “Nəsillərin birləşməsi” konfransında çıxışı zamanı Moldovanın Rumıniyadakı səfiri Mixail Qribinça söyləyib. Onun sözlərinə görə, Rumıniya ilə Moldovanın birləşməsinə müdrik yanaşmaq lazımdır:

“Əgər situasiyanı analiz etsək, biz 1918-ci illə indiki vəziyyət arasında fərq olduğunu görərik. Əvvəla, indiki Moldova 1918-ci ilin Bessarabiyası deyil. Bu, həm milli tərkib, həm də ərazi və sərhədlər nöqteyi-nəzərindən fərqlidir. İkincisi, Moldovanın ərazisinin bir hissəsi Rusiya tərəfindən işğal edilib. Burada Dnesteryanı yaradılıb. Üstəlik, bizim tərkibimizdə Qaqauziya muxtariyyəti də var. Qaydalara görə, Moldova müstəqilliyini itirəcəyi halda o öz müstəqilliyini elan edə bilər. Hazırda Moldovada yaşayanlar sovet partiya məktəbini keçiblər. Bundan ayrılmaq isə çox çətin olacaq”.

Qeyd edək ki, Rumıniya siyasi elitasının böyük bir hissəsi indiyə qədər Moldovanı öz ərazisi hesab edir. Doğrudur, Moldovada bu siyasi prosesin tərəfdarları olsa da, rusiyayönlülərin də sayı az deyil. Üstəlik, son illər hazırkı hökumətin uğursuzluqları əhali arasında rusiyayönlü qüvvələrin dəstəkçilərinin sayını artırıb.