ABŞ azərbaycanlıları xüsusi kampaniya başlatdı

Azərbaycan prezidenti İlham Əliyevin Nüvə Sammitində iştirak üçün ABŞ-a gözlənilən səfəri ilə bağlı bu ölkədə yaşayan azərbaycanlı fəallar prezident Barak Obamaya müraciət ediblər. Müraciət müəllifləri Obamanı azərbaycanlı həmkarı ilə görüşməməyə çağırırlar.

Bu məqsədlə ABŞ azərbaycanlıları Ağ Evin rəsmi səhifəsində petisiya yaradaraq, imzatoplama kampaniyasına başlayıblar.

Müraciətdə deyilir ki, ABŞ prezidentinin azərbaycanlı həmkarı ilə görüşməsi qəbuledilməzdir. ABŞ prezidenti Azərbaycanda 100 nəfərdən artıq siyasi məhbusun olduğu, insan hüquq və azadlıqlarının tapdalandığı bir vaxtda diktator İlham Əliyevlə görüşdən mütləq imtina etməlidir.

Müraciət müəlliflərindən biri Emil İsmayıl “Azadlıq” qəzetinə deyib ki, Azərbaycandakı avtoritar rejimin bu görüçə ehtiyacı var. “O öz təbliğatı üçün bundan istifadə etmək niyyətindədir. Çoxları ümid edir ki, Barak Obama və İlham Əliyevin görüşü müsbət nəticələr verə bilər. İlham Əliyevlə Fransa prezidenti Fransua Ollandın görüşündən sonra nə baş verdi? Leyla Yunus həbs olundu. İlham Əliyev rejimi geri çəkilmək niyyətində deyil. Onu buna məcbur etmək lazımdır. Biz siyasi məhbusların azad olunmasını tələb edirik. Mart ayında keçiriləcək Nüvə Sammitinə qədər siyasi məhbuslar azad olunmasa, biz kampaniyanı davam etdirəcəyik, İlham Əliyevə ABŞ-da sürprizlər yaşadacağıq”, – deyə E.İsmayıl bildirib.

Ağ Evin rəsmi səhifəsində yaradılan petisiya

“İlham Əliyevin hakimiyyəti dövründə 100-dən çox muxalif aktivist saxta ittihamlarla həbs olunmuşdur. İlham Əliyev sonsuz məhbus siyahısının “müəllifidir” və məhbsuları azad etməkdən imtina edir. Tanınmış jurnalist Xədicə İsmayıl türmədən məktub göndərməyə nail olmuşdur. Onun məktubunda deyilir: “Həqiqət odur ki, Azərbaycan insan hüquqları krizisi yaşayır. Bundan pis hələ heç vaxt olmamışdır. Azərbaycan hökümətinə sizin diqqətinizi yayındırmağa imkan verməyin.” Son həbsləri və davam edən insan hüquq pozuntularını nəzərə alıb, ABŞ prezidenti Barack Obama İlham Əliyevlə görüşdən imtina etməlidir”.