QAT aksiya keçirəcək

Qarabağ Azadlıq Təşkilatı Gürcüstanda yaşayan soydaşımız Turqay Mikayılovun erməni sərhədçiləri tərəfindən tutularaq Ermənistana aparılması, həmçinin Gürcüstanın azərbaycanlılar yaşayan bölgələrinə qarşı Ermənistan tərəfindən müxtəlif təxribatların törədilməsi, bu ərazilərdə torpaqların zəbt edilməsi ilə bağlı Gürcüstanın Azərbaycandakı səfirliyi qarşısında etiraz aksiyası keçirmək üçün qərar verib. Bu gün bu barədə müraciət Bakı şəhər İcra hakimiyyətinə göndərilib. Müraciətdə göstərilir: Aşağıda imza edənlərin təşkilatçılığı ilə 2015-ci il avqustun 18-də saat 12:00-dan 13:00-dək Gürcüstanın Azərbaycandakı səfirliyi qarşısında etiraz aksiyasının, piketin keçirilməsi qərara alınıb. Aksiyada Qarabağ Azadlıq Təşkilatının 50 nəfər üzvünün iştirakı nəzərdə tutulur. Aksiya iştirakçıları Gürcüstanın azərbaycanlılar yaşayan ərazilərində ermənilərin törətdikləri təxribatçı hərəkətlərin, azərbaycanlıların ermənilər tərəfindən müxtəlif təzyiq və qəsdlərə məruz qalmaları, onların tutularaq Ermənistana aparılması, orada saxlanılması hallarının qarşısının alınması üçün Gürcüstan hökumətindən tədbirlərin görülməsini tələb edəcəklər.

Son dövrdə Gürcüstanın icra və hüquq-mühafizə orqanlarının diqqətsizliyi və biganəliyi nəticəsində bu ölkədə ermənilərin və onların havadarlarının antiazərbaycan siyasəti fəallaşıb, sərhədboyu azərbaycanlılar yaşayan ərazilər Ermənistanın sərhəd qüvvələri tərəfindən zəbt olunur, azərbaycanlılar oğurlanıb Ermənistana aparılır, onlara qarşı işgəncələr tətbiq olunur, hətta öldürülür. Konkret olaraq, ermənilər son aylar ərzində bir sıra sərhəd rayonlarında, o cümlədən Xuludərə, Təzəkənd, Təkəli, Sadaxlı kəndləri istiqamətində məkrli planlar həyata keçirməyə cəhd göstərir, azərbaycanlı Turqay Mikayılovu tutub apararaq Ermənistanda saxlayırlar. Çox maraqlıdır ki, ermənilər tərəfindən oğurlanan, öldürülən adamların içərisində bu günə qədər bir gürcü də olmayıb. Bütün bunlar göstərir ki, Ermənistan hakimiyyəti azərbaycanlılara qarşı planlı şəkildə iş aparır, azərbaycanlıları əsrlərlə yaşadıqları ərazilərdən qovub çıxartmağa çalışırlar. Bir şey aydındır ki, ermənilər Gürcüstanda ikinci Qarabağ cəbhəsi açmağa, burada da Qarabağ ssenarisini təkrar etməyə çalışırlar. Təəssüf ki, Gürcüstan hakimiyyəti bu erməni siyasətinin qarşısının alınması üçün təsirli tədbirlər görmür.

Xahiş edirik, bu deyilənləri nəzərə alaraq bizim aksiya keçirməyimiz üçün sanksiya verəsiniz, aksiyanın təhlükəsizliyinin təmin olunması üçün uyğun orqanlara sərəncamlarınızı verəsiniz.