Qarabağ Azadlıq Təşkilatının sədri Akif Nağı artıq bir ildir ki, Gürcüstana girişinə qadağa qoyulması ilə bağlı bu ölkənin prezidenti və baş nazirinə məktub göndərib.

Məktublarda göstərilir: Mən, Azərbaycan Respublikasının vətəndaşı, Azərbaycanda fəaliyyət göstərən Qarabağ Azadlıq Təşkilatının sədri Akif Nağı Gürcüstan Respublikasına girişimə qadağa qoyulması ilə bağlı Sizə müraciət edirəm. Mən bu qadağa ilə 2014-cü il iyunun 5-də üzləşmişəm. Həmin vaxt mən Türkiyədən qayıdarkən Sərpi keçid-sərhəd məntəqəsində saxlanılaraq geri qaytarılmışam. Həmin gündən bir ildən çox vaxt keçib. Lakin bu günə qədər mənə bu qadağanın səbəbini izah etməyiblər. Mən bir neçə dəfə Gürcüstanın xarici işlər nazirliyinə, Gürcüstanın Azərbaycandakı səfiriliyinə müraciət etmişəm, lakin heç bir aydın cavab almamışam.

Mən 2013-2014-cü illərdə bir neçə dəfə Gürcüstanda olmuşam, Qeyri-hökumət təşkilatları, Universitet rəhbərləri və tələbələri, Abxaziya və Cənubi Osetiyadan olan məcburi köçkünlər və digər nümayəndələrlə görüşmüşəm, Azərbaycan və Gürcüstan arasındakı ictimai əlaqələrin inkişafı, münaqişələrlə bağı informasiya mübadiləsi, işğala və separatizmə qarşı birgə fəaliyyət istiqamətlərinə dair müzakirələr aparmışıq. Mən hər yerdə Azərbaycan və Gürcüstan xalqları və dövlətlərinin dostluğunun, əməkdaşlığının vacibliyini təbliğ etmişəm. Ona görə də mənim Gürcüstana girişimə qadağa qoyulması başa düşülən deyil və yalnız anlaşılmazlıq, ya da təxribat ola bilər.

Xahiş edirəm, bu məsələyə müdaxilə edəsiniz və mənim barəmdə verilmiş bu yanlış qərarın ləğv olunmasına və yaxud günahım varsa, onun açıqlanmasına yardımcı olasanız.