BAKI, 2 aprel. TELEQRAF

Energetika naziri Pərviz Şahbazov Dünya Bankının Cənubi Qafqaz üzrə regional direktoru Roland Praysın rəhbərlik etdiyi nümayəndə heyəti ilə görüş keçirib.

Teleqraf xəbər verir ki, nazir bu barədə "X" sosial şəbəkəsində məlumat verib. Görüşdə Azərbaycanda enerji sektorunun inkişafı, o cümlədən ötürücü şəbəkənin gücləndirilməsi, bərpa olunan enerji mənbələrinin inteqrasiyası və gələcək əməkdaşlıq imkanları müzakirə olunub.

Xüsusilə, AZURE layihəsinə göstərilən dəstəyin bərpa olunan enerji mənbələrinin şəbəkəyə inteqrasiyası baxımından mühüm addım olduğu vurğulanıb. Eyni zamanda, Dünya Bankı ilə dənizdə külək enerjisinin inkişafı, yaşıl enerji dəhlizlərinin yaradılması, nasoslu hidroenerji anbarları və digər perspektiv layihələr üzrə əməkdaşlıq imkanları ətrafında fikir mübadiləsi aparılıb.