Rusiya ilə Türkmənistan arasında qaz əməkdaşlığının dayandırılmasının  siyasi səbəbləri var.

Bunu Axar.az-a politoloq İlqar Vəlizadə deyib.

Ekspertin sözlərinə görə, əslində, türkmən qazı “Qazprom” üçün rəqib idi: “Qazprom” Rusiyanın cənubunu öz qaz satışı ilə təmin etmək istəyir. Türkmənistan isə Rusiya-Ukrayna münaqişəsindən zərərçəkən tərəf idi. Çünki Aşqabad Rusiya vasitəsilə Ukraynaya qaz sata bilmirdi və getdikcə bu bazara maraq azaldı.

2009-cu ildən isə Çin türkmən qazının əsas alıcısına çevrildi. Türkmənistan Çinə 27 milyard kub metr qaz nəql edir. Hazırda 3-cü qaz boru kəməri çəkilir ki, bu xətt vasitəsilə 2020-ci ilə qədər Çinə qaz nəqli 55-60 milyarda çata bilər. TAPİ boru kəməri vasitəsilə türkmən qazı artıq Pakistan və Hindistana da ötürüləcək”.

Politoloqun fikrincə, Türkmənistanın gələcək strateji layihələrində Rusiya nəql sistemindən istifadə perspektivi yoxdur: “İranla Türkmənistan arasında enerji layihələri var ki, türkmən qazının bir hissəsi də İran vasitəsilə Türkiyəyə çatdırıla bilər.

Reallıq ondan ibarətdir ki, Türkmənistan öz qazını Qərbə ötürməklə bir sıra problemlərini həll edəcək. Məhz buna görə də Rusiya indidən diqqətini Özbəkistana bazarına yönəltməyə başlayıb”.

Qeyd edək ki, yanvarın 4-də “Qazprom” Türkmənistandan təbii qaz alışını dayandırıb.