Zaqatala Rayonu Muxax kəndi sakini Seyidəhmədova Mayram Məhəmməd qızı Zaqatala Rayon Məhkəməsinin Hakimi Elburus Məmmədov haqqında Teleqraf.az vasitəsi ilə Dövlət başçısı İlham Əliyevə şikayət ünvanlayıb.

Həmin şikayəti olduğu kimi təqdim edirik:

Prezident cənab İlham Əliyev sahibkarlara maneə yaratmamağı məmurlara dəfələrlə tapşırsa da,  Zaqatala rayonunda bir çox məmurlar buna əməl etmirlər. Mən sahibkarlıq fəaliyyəti ilə məşğul oluram. Kənddə olan çörəkbişirmə seximdə 11 nəfər, dükanımda 2 nəfər, avtomobil təmiri seximdə 3 nəfər və çayxanamda 2 nəfər işləyir. Bütün sənədlərim tam qaydasındadır. Hər ay vaxtı-vaxtında dövlət vergisini ödəməyimə baxmayaraq heç bir əsas olmadan Zaqtala Rayon Məhkəməsinin Hakimi Elburus Məmmədov qanunu fəaliyyətimə qanunsuz olaraq mane olmaq istəyir. Sahibkarlıq fəaliyyəti ilə məşğul olan qanunu mülkiyyətimin sökülməsi üçün məhkəməyə verilən iddianın tam əsassız olmasına baxmayaraq hakim süründürməçilik yaradır.Hansı ki, təqdim edilən sənədlərə əsasən həmin iddia əsassız olduğu üçün rədd edilməli idi. İddianı verən kənd sakini Süleymanov Faiq Süleyman oğlu sahibkarlıq fəaliyyəti ilə məşğul olduğum obyektə gələn elektirik xəttini qanunsuz olaraq kəsib. Mən bu barədə Zaqatala Rayon Polis Şöbəsinə şikayət ərizəsi ilə müraciət etmişəm. Bu boyda qanunsuzluq olmaz!  Mən qanunu sənədlərimlə mülkiyyət əldə edib qanunu dövlət vergisini ödəməklə sahibkarlıq fəaliyyəti ilə məşğul oluram.  Mənim fədakarlığım nəticəsində 18 nəfər işləyib ailəsinə qazanc aparırlar. Hətta çörəkbişirmə seximi ziyanla işlətməyimə baxmayaraq bağlamıram ki, 11 nəfər burada işləyən zəhmətkeş insanlar işsiz qalmasınlar. Mən dövlətimizi düşünüb bunu etsəm də Zaqatala Rayon Məhkəməsinin Hakimi Elburus Məmmədov öz şəxsi maraqlarına görə 18 nəfərin çörəyinə dəymək istəyir. Mən mətbuat vasitəsi ilə bir ağbirçək ana , sahibkar qadın olaraq Prezident cənab İlham Əliyevə, Prezidnt Administirasiyasında yaradılmış Apellyasiya Şurasına müraciət edib xahiş edirəm, mənim sahibkarlıq fəaliyyətimə maneə yaradıb süründürməçiliyə məruz qoyan vəzifəli şəxslərin və elektirik xəttini qnunsuz kəsmiş şəxsin barəsində ciddi tədbirlər görəsiniz. Sahibkarın inkişafına xüsusi diqqət yetirdiyi üçün hörmətli Prezidentimiz İlham Əliyevə minnətdarlığımı bildirirəm.